Изборите, кои критичарите веќе ги прогласија за нефер, во голема мера се сметаат за референдум за продолжување на сеопфатната инвазија на претседателот Владимир Путин врз Украина, која веќе длабоко навлезе во петтата година.

Путин ги нарече изборите „заеднички придонес кон победата на Русија“ против Украина.

Значи, рускиот лидер воопшто не се грижи за тоа што ќе се случува во следните три дена, но за разлика од него, голем број Руси сериозно стравуваат од она што би можело да следува. Секако, станува збор за потенцијална масовна мобилизација.

Отворање сметки и префрлање имот

Во Кремљ во последните месеци жестоко ги демантираат наводите дека се планира нова мобилизација, но бројни европски безбедносни служби се убедени дека Путин до крајот на годината планира да испрати во војната дури 300.000 луѓе.

Дека сепак можеби има нешто во овие тврдења, покажуваат и наводите на угледниот „Блумберг“ кој пишува дека голем страв се проширил и во самиот Кремљ, па дури и меѓу вработените во воените регрутни центри. Во прилог на ова тврдење одат и доказите дека во последните месеци масовно се отвораат банкарски сметки во странство, но и дека имотот се префрла надвор од Русија.

„Високи функционери од Кремљ ги поттикнуваат своите пријатели и роднини што поскоро да ја напуштат земјата“ покажуваат документите до кои дошол „Блумберг Њуз“.

Меѓутоа, во Русија очигледно по секоја цена сакаат да ги избегнат сцените што се случиле во 2022 година, кога по најавата на Путин следувал масовен егзодус. Затоа бил направен план – тајно изградиле дигитална платформа за повикување граѓани во војска, а истовремено ги затвораат потенцијалните излезни патишта од земјата.

Додека мобилизацијата во 2022 година се темелела на врачување хартиени повици на воените обврзници, денес „Единствениот регистар на воени обврзници“ е автоматски поврзан со даночните служби, полициските бази на податоци, медицинската евиденција, регистрите на имот и граничната контрола.

Според изменетите прописи, електронскиот повик се смета за правосилно доставен седум дена откако ќе биде објавен на порталот, без оглед на тоа дали примачот го отворил. Истовремено, на граничните премини автоматски се активира забрана за напуштање на земјата, со што на лицата на кои им е доставен повикот им се оневозможува да ја напуштат Русија.

Бројот на загинати во Украина

На оние кои во рок од 20 дена нема да одговорат на повикот да се јават во регрутниот центар, автоматски може да им бидат воведени дополнителни санкции. Тие вклучуваат ограничување на пристапот до јавни услуги – меѓу другото, регистрација на возила, трансакции со недвижности, кредити…

Новинарите на „Блумберг“ стапиле во контакт со лице запознаено со ситуацијата во Москва. Според неговите зборови, околу 1.000 руски војници неделно гинат во Украина. Тоа се бројки што руската војска не може да ги издржи, а кога на тоа ќе се додадат неискусните и недоволно обучени нови регрути, тогаш е јасно дека руската војска се соочува со сериозен проблем.

„Ситуацијата на фронтот јасно покажува дека Русија нема доволно воени капацитети за напредување. Со други зборови, мобилизацијата би била неопходна доколку целта е Донбас да биде освоен во рок од шест месеци“ истакнал Кирил Рогов, раководител на истражувачката група „Re: Russia“, со седиште во Виена.