Кога се борите со настинка, апетитот често се намалува, но одредени намирници можат да помогнат со хидратацијата, зајакнувањето на имунитетот, како и со ублажувањето на симптомите на воспалено грло, кашлица и затнат нос.
Како што наведува „Health“, бананите се благи за дигестивниот систем и често се прифатливи дури и кога не се чувствувате добро. Содржат фруктани, шеќери со антивирусни својства кои можат да го поддржат имунолошкиот систем.
Бобинките, како боровинки и малини, се богати со антиоксиданси и имаат антивоспалителни и антивирусни својства.
Топлата течност може да биде особено корисна за време на настинка. Бујонот има антивоспалителни својства, аминокиселини и минерали кои го поддржуваат имунитетот, а може да се подготви со лук, ѓумбир, куркума и црн бибер. Супата исто така може да помогне бидејќи пареата ја придвижува слузта низ носот и го ублажува затнувањето, додека течноста придонесува за хидратација.
Морковот може да се додаде во бујони или супи, а го поддржува имунитетот со својата содржина на бета-каротен. Кељот и спанаќот исто така се корисни бидејќи содржат витамини и минерали, вклучително и витамин Ц, витамин Е и флавоноиди.
Пиперките, особено каенскиот пипер, можат да ја разредат слузта и да го олеснат назалното затнување, додека капсаицинот може да помогне во смирувањето на нападите на кашлица.
Чајот од камилица содржи флавоноиди со антивоспалителни својства и може да помогне да се чувствувате подобро. Сокот од калинка го поддржува имунитетот со антимикробното и антивоспалителното дејство, додека медот може да ја ублажи кашлицата кај децата. Мед не смее да им се дава на деца помлади од една година бидејќи може да предизвика ботулизам.
Цитрусното овошје, како портокали, лимони и лимети, содржи витамин Ц и фолат, хранливи материи важни за функционирањето на имунолошкиот систем. Црешите, благодарение на витаминот Ц и мелатонинот, можат да помогнат во ублажувањето на симптомите и поддршката на здравиот сон, кој е важен во борбата против вирусите и бактериите.
Лукот содржи фруктани и долго време се користи против инфекции, но потребни се дополнителни истражувања за неговата ефикасност кај настинката.
Ѓумбирот може да ги ублажи мачнината и повраќањето и содржи антивоспалителни хранливи материи, иако доказите за неговото дејство се ограничени. Куркумата содржи куркумин, моќно антивоспалително соединение, а неговото дејство се засилува во комбинација со црн бибер.
Оревите се меѓу вообичаените антивоспалителни намирници и содржат хранливи материи важни за имунитетот, вклучително и витамините Е и Б6, бакар и фолат.
