Зборувајќи за албумот „Кукла жива“, Тамара не успеа да ги задржи солзите. Таа откри дека дури откако ги слушнала песните што ги создавале, станала свесна колку долгиот период на внатрешен немир и напнатост оставил последици врз неа.

„Сфатив, всушност, колку сум јас оштетена. Сериозно. Јас сум емотивно оштетена. Бев во еден грч многу долг период. Што на приватен, што на професионален план, многу работи ми се случија и едноставно бев во многу голем грч“, сподели Тамара.

Таа објасни дека песните за неа станале нешто повеќе од музика. Додека ги слушала, во нив препознала делови од сопствените чувства и искуства.

„И моментот кога ги слушав песните што ги создававме, сфатив, всушност, колку сум јас оштетена. Овие песни буквално можеш да ги видиш, не само да ги чуеш, туку и да ги видиш“, рече пејачката.

Токму затоа „Кукла жива“ го доживува како еден од најличните проекти во нејзината кариера, а според неа, и како најемотивниот албум што досега го создала.

„Затоа мислам дека го гледам ова како најемотивниот албум во мојот живот и песни кои се вистински дел од мене, од мојата душа, од срцето и од сè“, вели Тамара.

Албум што стана огледало на еден период

„Кукла жива“ е визуелен албум составен од десет песни и десет визуелни приказни. Материјалот беше објавен на почетокот на септември, а песните се инспирирани од различни периоди од животот и 25-годишната кариера на Тодевска.

Песните ги потпишуваат Тамара Тодевска и Коста Петров, додека Џијан Емин ги работеше аранжманите и музичката продукција. Албумот е снимен со живи инструменти и хор.

Идејата за проектот започнала во ноември минатата година, кога Коста Петров ѝ испратил на Тамара порака со идеја за текст и мелодија. Од околу 20 песни што ѝ ги испратил, двајцата избрале десет, по што ги адаптирале текстовите и мелодиите и постепено го изградиле концептот на „Кукла жива“.

За Тамара, создавањето на албумот се претворило и во своевидно соочување со сопствените емоции. Песните ѝ помогнале да препознае состојби што, како што открива, долго време ги носела во себе, но не ги согледувала на ист начин.

Во разговорот таа се осврна и на сопствената промена во последниот период, посочувајќи дека денес е посериозна верзија од себе и дека повеќе не е истата Тамара која доцнела и не секогаш се појавувала навреме. Зборуваше и за довербата во партнерот, нагласувајќи дека немањето доверба може да биде токсично, како и за важноста на комплиментите што самите си ги упатуваме.

Една од нејзините пораки беше и добро познатата: „Пази што посакуваш“.

„Кукла жива“ за Тамара доаѓа во значаен момент од нејзината кариера. Оваа година таа одбележува 25 години на музичката сцена, а големото јубилејно одбележување е најавено за 7 декември, кога ќе одржи концерт во арената „Борис Трајковски“ во Скопје.

По две и пол децении на сцената, новиот албум носи поинаков вид личен печат. Не само поради темите што ги обработуваат песните, туку и поради начинот на кој самата Тамара во нив препознала делови од сопствениот живот.

Од тешкиот период за кој зборуваше со солзи, преку личните преиспитувања, до новиот музички материјал, „Кукла жива“ за неа претставува запис на една важна животна и уметничка фаза.