Новата Серија 3 на „BMW“ може да се нарача и со опционалниот пакет „M Sport“ или пакетот „M Sport Pro“. Тие го нагласуваат спортскиот карактер на одредени модели и им даваат особено динамичен изглед.
„BMW“ ја претстави новата Серија 3. И покрај популарноста на SUV моделите, овој автомобил и понатаму е исклучително важен во понудата на „BMW“, а традицијата подолга од 50 години го прави легендарен дел од портфолиото на германската марка. Очекувано, Серија 3 визуелно е слична на електричниот модел „i3“, но ги разликува фактот што се создадени на различни платформи – електричниот автомобил на платформата „Neue Klasse“, а Серија 3 на унапредената „CLAR“ платформа.
Серија 3 има подолга хауба и е долга 475 сантиметри. Најмоќниот модел во моментов, до пристигнувањето на „M“ верзијата, е „M350 xDrive“. „BMW“ со него нуди унапреден 3,0-литарски линиски шестцилиндричен мотор со турбополнач и 48-волтна благо-хибридна технологија. Бензинскиот мотор развива 426 КС, а при забрзувањето и менувањето на степените на пренос му помага електромотор со моќност од 18 КС, што резултира со импресивна вкупна системска моќност од 443 коњски сили. Моќноста се пренесува преку 8-степен автоматски менувач и погон на сите тркала, што овозможува забрзување од 0 до 100 km/h за 4,2 секунди и максимална брзина од 250 km/h.
Овој модел добива функција која „BMW“ ја нарекува „Drift Moment“. Овој режим привремено ја претвора лимузината во автомобил со погон на задните тркала. Функцијата нема да биде достапна при самото лансирање, туку ќе пристигне преку софтверско ажурирање подоцна во текот на следната година.
За оние на кои им е доволна помала моќност, претставени се и верзии со четири цилиндри, како „BMW 320“ со дволитарски „TwinPower Turbo“ мотор со 210 КС (како и американските модели „330/330 xDrive“ со 255 КС). Потврдено е и дека во иднина кон понудата ќе се приклучи „plug-in“ хибрид (PHEV). Со Серија 3 повеќе нема да се нудат дизел мотори.
Новата Серија 3 на „BMW“ може да се нарача и со опционалниот пакет „M Sport“ или пакетот „M Sport Pro“. Тие го нагласуваат спортскиот карактер на одредени модели и им даваат особено динамичен изглед. Внатрешноста ги користи придобивките од новата технологија преземена од моделот „i3“ и платформата „Neue Klasse“. Екранот „Panoramic iDrive“ се протега по целиот долен раб на ветробранското стакло и го заменува традиционалниот „head-up“ екран.
