Американската сојузна држава Тенеси не успеа да ја изврши егзекуцијата врз 50-годишната Криста Гејл Пајк, која беше осудена на смрт за убиство извршено кога таа имала 18 години.

За време на обидот за погубување, на Пајк ѝ биле дадени две дози пентобарбитал – лекот што Тенеси го користи за смртоносни инјекции – но таа останала жива. Потоа, со брза помош била пренесена од затворот во болница. Нејзината здравствена состојба засега е непозната.

Сè уште се слушало ‘рчење по двете дози

Новинарите присутни на погубувањето известија дека Пајк била врзана за носилка во просторијата за извршување на казната. Во еден момент, таа ја кренала главата и ги прашала затворските службеници дали е нормално нејзината рака да се чувствува на тој начин.

Втората доза пентобарбитал била дадена до 20:26 часот по локално време. Потоа, зад повлечената завеса сè уште можело да се слушне како Пајк гласно ‘рчи.

Микрофонот бил исклучен во 20:53 часот, а од новинарите било побарано да ја напуштат просторијата. Затворските службеници во тој момент не можеле да објаснат што се случило.

Нејзините адвокати поднеле итни барања до судовите, инсистирајќи на моментален прекин на постапката и обезбедување медицинска нега за неа.

Според Центарот за информации за смртната казна (Death Penalty Information Center), имало случаи кога погубувањата не можеле да се извршат поради тешкотии при наоѓање вена, но не е познат претходен случај во кој осуденик останал жив откако веќе биле дадени лековите за погубување. Погубувањето првично било запрено, а потоа било дозволено да продолжи.

Првично било планирано Пајк да биде погубена во среда наутро. Федералниот апелационен суд го запрел погубувањето околу еден час пред закажаното време за да го разгледа тврдењето на одбраната дека сексуалната злоупотреба и траумите од детството што таа ги претрпела не биле соодветно земени предвид при изрекувањето на казната.

Тенеси поднел жалба до Врховниот суд на САД, кој подоцна истиот ден ја укинал суспензијата и дозволил погубувањето да продолжи.

Доколку погубувањето било успешно извршено, Пајк ќе станела првата жена погубена во Тенеси по повеќе од 200 години.