Тиркизното море, густите борови шуми и сончевите лозја го прават Поркерол еден од најавтентичните острови во Европа. Ова парче земја во облик на кроасан се наоѓа на Француската ривиера, а од копното е оддалечено само дваесетина минути со брод. Со оглед на тоа што е долг седум, а широк само три километри, идеален е за истражување со велосипед или пеш, особено затоа што на него нема автомобили ниту јавен превоз.
Французите често го нарекуваат „пловечка шума“, а со само 200 постојани жители останал надвор од главните туристички рути. Во октомври островот нуди пријатни температури од околу 22 Целзиусови степени и мирна атмосфера далеку од гужвите, пишува „Metro“.
На островот се наоѓа и една од најубавите европски плажи
За еднодневни посети се препорачува одење на некоја од познатите плажи. „Plage Notre-Dame“, која се наоѓа во Националниот парк „Port-Cros“, редовно се вбројува меѓу најубавите во Европа, а „The Economic Times“ неодамна ја стави на својот список на седумте најдобри француски плажи за 2026 година.
Вреди да се посети и „Plage d’Argent“, плажа со бел песок и плитко, кристално чисто море, која се наоѓа во близина на пристаништето. Тука е и „Plage de La Courtade“, пространа плажа опкружена со еукалиптуси, од која се протега одличен поглед на зајдисонцето.
Има врвни вина и ресторани со Мишелин ѕвезди
На островот работат три винарии кои произведуваат вина со ознака Côtes de Provence, познати по лесното и освежително розе. Покрај најпознатата, „Domaine de la Courtade“, тука се и „Domaine Perinsky“ и „Domaine de L’Ile“. Винаријата „Perinsky“, отворена во 1993 година во центарот на главното село, се издвојува по тоа што не прима резервации, што е идеално за спонтани посети.
Тврдината „Sainte Agathe“, изградена во 16 век по налог на кралот Франсоа I, нуди панорамски поглед од 360 степени кон целиот остров, неговите маслинови насади и лозја. По разгледувањето, посетителите можат да се упатат кон музејот „Fondation Carmignac“, познат по изложбите на фотографии.
Иако има само 200 жители, Поркерол има неколку квалитетни ресторани. „La Pinède“ е вклучен во водичот „Michelin“, а станува збор за ресторан со опуштена атмосфера, сместен во изолиран хотел до кој сообраќа шатл-автобус. Отворен е само за ручек и нуди медитерански и провансалски специјалитети.
За вечера се препорачува „La Fringale“, ресторан кој за 2026 година ја доби наградата „TripAdvisor Travellers’ Choice“. Служи класични француски јадења по цени од 9 до 29 евра. Оние кои сакаат да јадат во центарот на случувањата можат да ја изберат „Villa Sainte Anne“ на главниот плоштад, чија тераса е идеална за набљудување на животот во селото.
