Шефот на „United Airlines“, со плата од 32 милиони долари, бара данок на наследство близу 100 проценти: „Јас би го плаќал“

Кирби го изјави ова во интервју за весникот „New York Times“ минатата недела. Тој беше прашан зошто јавноста сè помалку им верува на директорите на големите компании.

„Нееднаквоста во богатството стана опасност за нашето општество и мораме да го решиме тој проблем. Нѝ треба национален данок на богатство. Тоа не би функционирало на ниво на сојузните држави, бидејќи луѓето едноставно би се преселиле. Исто така, сметам дека треба да имаме даноци на наследство кои, над одредено ниво, би достигнувале речиси 100 проценти. Јас би ги плаќал“, изјави Кирби.

Тој не прецизираше од кој износ на богатство би се применувал данокот ниту каква даночна стапка би поддржал.

Според годишниот извештај на компанијата за акционерите, Кирби за 2025 година примил вкупно 32,28 милиони долари. Од таа сума, 1,2 милиони долари биле основна плата, 22,6 милиони долари во акции, осум милиони долари во бонуси, а половина милион долари во други примања.

Половина од вработените во „United Airlines“ заработуваат помалку, а половина повеќе од 96.670 долари годишно. Тоа значи дека Кирби примил 334 пати повеќе од вработениот што се наоѓа на средината на платната скала.

Гувернерот на Луизијана, Џеф Лендри, порача на социјалната мрежа „X“ дека Кирби, ако навистина толку силно верува во тоа, може едноставно да ги уплати парите. Притоа, тој објави и линк до фондот на американското Министерство за финансии, кој прима донации за отплата на државниот долг.

САД немаат федерален данок на наследство, иако таков данок постои во некои сојузни држави. Постои федерален данок на оставина, кој го плаќа оставината, а не наследниците. Според податоците на американската Управа за внатрешни приходи, неговата највисока стапка изнесува 40 проценти, а се плаќа на имотот чија вредност надминува 15 милиони долари.

Според податоците на Федералните резерви, најбогатиот еден процент од американските домаќинства во вториот квартал од оваа година поседувал 32,5 проценти од вкупниот нето-имот во земјата. Најсиромашната половина од домаќинствата поседувала само 2,3 проценти.

Кирби е на чело на „United Airlines“ од 2020 година. Во истото интервју, тој ја бранеше и дополнителната наплата за подобри седишта во авионот, со образложение дека седиштето до прозорецот или подобрата позиција претставуваат услуга што има своја цена.