Италијанскиот регион Калабрија започна програма наречена „Ripopola Calabria“, во чии рамки на заинтересираните граѓани ќе им бидат понудени 50 куќи и станови за бесплатно користење во период од десет години.

Покрај тоа што нема да плаќаат кирија, идните станари нема да мора да ги покриваат ниту трошоците за реновирање на недвижностите, бидејќи тие ќе бидат финансирани од регионалните власти.

Програмата ја претстави претседателот на Калабрија, Роберто Окиуто, кој ги повика сите кои сакаат да го променат својот начин на живот и да се преселат во некое од италијанските села да ја разгледаат оваа можност, пренесе „Ил Месаџеро“.

„Дојдете да живеете во Калабрија, бидејќи животот во Калабрија е убав и поволен“, порача Окиуто во видеоснимка објавена на социјалните мрежи.

На располагање 50 недвижности во 26 населени места

Во првата фаза од проектот ќе бидат понудени 50 станбени единици, распоредени во 26 населени места, во сите пет провинции на Калабрија.

Станува збор главно за објекти во јавна сопственост, кои со години не биле користени и на кои им е потребна реконструкција за повторно да станат погодни за живеење.

Регионалните власти ќе обезбедат средства за нивно реновирање, по што недвижностите ќе им бидат доделени на избраните учесници во програмата.

За обновата е предвидено финансирање до 2.000 евра по квадратен метар, додека максималната вредност на инвестицијата во една недвижност може да достигне дури 280.000 евра.

Кој може да добие куќа без плаќање кирија?

Програмата е наменета за лица кои моментално живеат надвор од Калабрија, а сакаат трајно да се преселат во овој италијански регион.

Недвижностите нема да станат сопственост на корисниците, туку ќе им бидат отстапени на бесплатно користење во период од десет години. За тоа време тие нема да имаат обврска да плаќаат кирија.

Посебно внимание ќе им биде посветено на Италијанците со потекло од Калабрија кои сакаат да се вратат во родниот крај, но и на младите парови, семејствата со деца, стручните лица од различни области и луѓето кои работат од далечина.

Заинтересираните мора да поднесат пријава преку официјалниот портал „ripopola.regione.calabria.it“.

Сепак, поднесувањето пријава не значи автоматско добивање недвижност. Надлежните ќе состават јавна ранг-листа врз основа на исполнувањето на условите и критериумите утврдени со правилата на програмата.

Каде се наоѓаат бесплатните куќи?

Недвижностите се распоредени во неколку италијански провинции, а меѓу населените места вклучени во програмата се Сан Флоро и Амато во провинцијата Катанѕаро, како и Алесандрија дел Карето, Шилјано и Ровито во провинцијата Козенца.

Во провинцијата Вибо Валентија учествува местото Чезанити, каде што се достапни две станбени единици, додека во провинцијата Реџо Калабрија се вклучени Гротерија и Санто Стефано ин Аспромонте.

На списокот се наоѓа и Какури, населено место во провинцијата Кротоне.

Од куќи со 140 квадратни метри до помали станови

Недвижностите вклучени во програмата се разликуваат по големина и распоред, па меѓу нив има простори погодни за семејства со деца, парови, но и за поединци.

Во местото Сан Флоро се нуди куќа со површина од околу 140 квадратни метри, сместена на плоштадот Пјаца Рома. Има четири простории, посебен влез и панорамски поглед кон населбата. Распоредот овозможува и уредување простор за работа од дома.

Слична недвижност се наоѓа во местото Амато, на улицата Џузепе Мацини. Куќата, исто така, има околу 140 квадратни метри, распоредени на три нивоа, балкони и посебен влез, како и традиционални архитектонски детали.

За оние на кои не им е потребен голем простор, во местото Алесандрија дел Карето е достапен стан со површина од 52 квадратни метри. Се наоѓа во историскиот центар на населбата и има две простории.

Во Шилјано е предвидена куќа од приближно 85 квадратни метри, со балкон, погодна и за семејство со деца.

Во Ровито, еден објект во јавна сопственост ќе биде реновиран и претворен во три независни станбени единици.

Зошто Италија бесплатно отстапува недвижности?

Зад оваа програма стои сериозен демографски проблем со кој се соочуваат бројни помали населени места во Италија.

Селата во Калабрија со години губат население, а последиците од иселувањето се чувствуваат преку затворањето на продавниците, намалувањето на бројот на ученици во училиштата и слабеењето на основните услуги.

Затоа регионалните власти се обидуваат да привлечат нови жители преку конкретни финансиски поволности.

Целта на проектот „Ripopola Calabria“ не е самообновување на напуштените куќи, туку и оживување на локалните заедници преку доселување млади семејства, вработени лица и стручни кадри кои би можеле да придонесат за економскиот и општествениот развој на овие места.