Агенцијата „Reuters“ објави уште четири фотографии од поранешниот извршен директор на „Nvidia“, Џенсен Хуанг, и Алис Хуанг, позната и како Хуанг Ле, направени за време на саемот „Computex Taipei“ во јуни 2024 година, на кои двајцата се во близок физички контакт.
Тоа се случило откако Хуанг одржал воведно предавање пред почетокот на технолошкиот саем „Computex“. На една од фотографиите, Хуанг, облечен во својата препознатлива кожна јакна, ја привлекува Алис Хуанг кон себе, а таа ја држи раката на неговите гради. На друга фотографија, таа го прегрнува околу вратот, додека тој ја држи околу половината.
На Алис Хуанг може да се забележи и акредитација со натписот „Nvidia“, иако таа никогаш не работела во компанијата.
Повикувајќи се на лица запознаени со ситуацијата и на интерна преписка што ја прегледал, „Reuters“ објави дека, пред избивањето на скандалот со аферата, Хуанг довел во заблуда неколку раководители на „Nvidia“, меѓу кои и главниот правен советник Тим Тетер и директорката за маркетинг Алисон Вагонфелд, во врска со природата на неговиот однос со Алис Хуанг.
Извори навеле дека во есента 2025 година, а повторно и во октомври 2026 година, кога новинарските прашања го насочиле вниманието на раководството на „Nvidia“ кон неговиот однос со „Megaspeed“ и Алис Хуанг, Хуанг ги опишал нивните контакти како соодветни и вообичаени деловни односи со клиенти.
Изворите исто така изјавиле дека Хуанг размислувал за покренување правна постапка против „The New York Times“, откако во октомври минатата година бил објавен напис во кој се привлекувало внимание на неговите јавни средби со Алис Хуанг, но на крајот ниту „Nvidia“ ниту Хуанг поднеле тужба. Портпаролот на „The New York Times“ изјавил дека весникот не добил никакво правно барање.
Хуанг (63) на 8 ноември, во порака до вработените признал дека ѝ бил неверен на сопругата Лори, со која е во брак од 1985 година.
„The New York Times“ пишува дека американските официјални лица заклучиле оти Алис Хуанг работела за кинеската разузнавачка служба и дека му пренесувала деловни информации на Пекинг. Според истиот весник, тие не веруваат дека Хуанг знаел за нејзините активности. Кинеската амбасада во Вашингтон ги отфрлила обвинувањата. Министерството за внатрешни работи на Сингапур соопштило дека против неа не била водена истрага.
