Луѓето не му веруваат дека не јаде месо: Овој веган крева тежини и до 210 килограми

Масимо тврди дека ваквата исхрана не влијаела негативно на неговото тело. Токму спротивното, тој изградил неверојатни мускули. 

Некои се уверени дека билдерот зема стероиди бидејќи сметаат дека е невозможно така да се изгледа од вежбање и урамнотежена исхрана која се состои од зеленчук, но Бруначони тврди дека тоа не е точно.

Кога нема натпревари, во денот јаде 3500 калории, но во пресрет на шоуата во кои ги покажува завидните мускули, тој внесува 2200 калории. "Пред седум години сфатив дека е невозможно да ги сакате животните и да ги јадете. Мојот златен ретривер Луче е заслужен за тоа што станав веган", вели тој.

Масимо тренира шест дена во неделата, а јаде пет пати дневно. Типичната исхрана на овој бодибилдер се состои од овесни палачинки со џем или намаз од лешници. По појадокот, тој консумира ужина, најчесто овошје, протеински шејк и каша.

За ручек избира интегрален ориз, леќа и зеленчук, а за попладневната ужина јаде сушено овошје и јогурт од соја. Вечерата најчесто му се состои од тофу, зеленчук и семки.

"Многумина не веруваат дека не јадам месо. Тврдат дека земам стероиди, но тоа е потполно погрешно", уверува овој 33-годишен Италијанец кој само што се вратил од Светскиот натпревар по бодибилдинг во Америка на кој го освоил второто место.

"Од раѓање се занимавам со спорт и пред секој натпревар ме подложуваат на допински тест. Месото не е неопходна состојка во исхраната доколку сакате да имате мускулна маса", порачал Масимо.

Кога вежба клекнувања, билдерот може да крене импресивни 160 килограми, а кога е во прашање мртвото подигнување, крева и до 210 килограми тежина.

"Ако сте почетник во веганството, побарајте совет од доктор или нутриционист. Мора да научите колку калории да внесувате, од каде да ги добивате протеините, железото, калциумот и останатите нутритиенти. Важно е да го следите и внесот на витамини", додал Бруначони.