Овој потег на 29-годишната манекенка и претприемачка претставува голем пресврт, со оглед на тоа што во 2021 година изјави дека поради својата христијанска вера „никогаш“ не би се фотографирала без облека.

Детали од фотосесијата и реакции

На насловната страница на бразилското издание на списанието, сопругата на Џастин Бибер лежи на стомак на песочна плажа, додека во заднина се гледаат морето и зајдисонцето. На фотографијата е топлес, со видливи траги од костим за капење, а додека го пие бразилскиот пијалак „Guaraná Antarctica“, гледа директно во камерата.

Во вторникот на својот профил на Инстаграм таа ја споделила насловната страница и уште неколку фотографии од фотосесијата. Објавата собра повеќе од 1,3 милиони лајкови, меѓу кои од нејзиниот сопруг Џастин, Ким Кардашијан, Криси Тајген и Хиларија Болдвин, сопругата на нејзиниот чичко Алек Болдвин.

Фотографиите предизвикаа бројни коментари од нејзините познати пријатели и колешки. Нејзината пријателка Кајли Џенер оставила емотикон со исплазен јазик, додека нејзината сестра Клои Кардашијан напишала: „Мјаууу“.

Нивната заедничка пријателка Стаси Караниколау коментирала дека фотографиите се „лудо добри“, додека пејачката и актерка Клои Бејли додала: „Ова е неверојатно“. Манекенката и актерка Камила Мороне кратко напишала: „Тоа е тоа!“.

На другите две фотографии што ги објавила, таа е прикажана во слична поза на лежалка, но во бикини со жолти прерамки и розово-жолт долен дел. На последната фотографија од плажата носи проѕирен градник и спуштени спортски панталони што и го истакнаа стомакот.

Поврзаноста со Бразил

Иако Хејли можеби не изгледа како очигледен избор за лице на бразилско списание, нејзината мајка Кенија Деодато е Бразилка, ќерка на познатиот бразилски музичар и продуцент Еумир Деодато.

Самото списание на својот профил на Инстаграм објави дека дел од приходите од продажбата на секој примерок ќе бидат донирани на Центарот за жени имигрантки и бегалки во Сао Паоло. Тие наведоа и дека Бибер се согласила да донира ист износ како оној што списанието ќе го собере од продажбата.

Промена на ставот за голотијата

Обожавателите веројатно се изненадени од насловната страница бидејќи манекенката во интервју во 2021 година рекла дека никогаш не би се фотографирала гола. Тогаш, на својот Јутјуб канал, разговарала со актерката Ивон Орџи за христијанската вера и предизвиците што таа им ги поставува во нивните кариери.

„Ти си актерка. Глумиш во серија во која имаш секс-сцени, пцуеш и правиш работи поради кои многу христијани веројатно би рекле: ’Па, ти не си вистинска христијанка затоа што снимаш такви сцени‘“, рекла тогаш Бибер.

Додала дека и самата се соочува со слични критики. „Слично е и кај мене; понекогаш поради работата морам да покажам повеќе кожа или ме фотографираат во долна облека. Луѓето тогаш велат: ’Тоа не е добар пример бидејќи не си скромна‘“, објаснила Хејли.

Орџи на тоа одговорила дека никогаш не планирала да ги покаже градите пред камерите, а Хејли се согласила со неа. „Мислам дека и јас сум во фаза кога си велам: ’Во ред, никогаш не би сакала да се фотографирам гола‘, но секоја чест на секоја жена на која ѝ е удобно да го направи тоа“, изјавила таа тогаш.

Во истото интервју, Бибер истакнала дека верата што ја споделува со својот сопруг Џастин е клучна за нивниот брак. „Тоа е она во што веруваме. Да го немавме тоа, немаше да бидеме тука. Немаше ни да бидеме заедно“, рекла таа.

Парот се венчал во 2018 година, а во 2024 година го добиле своето прво дете, синот Џек Блуз Бибер.