Речиси осум милиони работни места во Велика Британија би можеле да бидат изгубени поради вештачката интелигенција, според извештајот кој предупредува дека жените, помладите работници и оние со пониски плати се во најголем ризик од губење на работата.
Институтот за истражување на јавни политики (IPPR) утврдил дека почетните, хонорарните и административни работи се најизложени на замена од вештачката интелигенција според „најлошото сценарио“ за воведување на нови технологија во следните три до пет години, известува „Guardian“.
Се повеќе компании усвојуваат генеративни „AI“ технологии за автоматизација на секојдневните задачи на работното место. Во извештајот се вели дека веќе актуелниот прв бран на усвојување на вештачката интелигенција ги доведува во опасност работните места, додека следниот бран би можел да доведе до автоматизација на повеќе работни места поради брзиот напредок на вештачката интелигенција.
Анализирајќи 22.000 работни задачи во сите видови на работа во економијата, „IPPR“ заклучува дека 11 проценти од задачите кои моментално ги вршат работници се загрозени. Тоа, меѓутоа, би можело да се зголеми на 59 проценти од задачите во вториот бран, бидејќи технологиите се развиваат за ракување со сè посложени процеси.
Моментално најизложени се задачи како управување со база на податоци, планирање и попишување, што потенцијално ги загрозува почетните работи и оние со неполно работно време во администрацијата и корисничките служби. Меѓутоа, вториот бран на усвојување на вештачката интелигенција би можел да влијае на нерутинските задачи кои вклучуваат создавање на база на податоци, пишување на текстови и графички дизајн, што би влијаело и на работите со поголема заработка. Жените би биле позначајно погодени, бидејќи „е веројатно дека ќе работат во најсложените професии, како административните професии“, пренесува „Tportal.hr“.
Во најлошото сценарио во вториот бран на вештачката интелигенција, 7,9 милиони работни места би можеле да бидат заменети, се наведува во извештајот, при што каква било добивка за економијата од подобрување на продуктивноста би била поништена со нулти раст на БДП во рок од три до пет години. Во најдобар случај на целосно зголемување на работната сила со генеративна вештачка интелигенција, ниедно работно место не би било изгубено, додека економијата би можела да расте за четири проценти.
„IPRR“ порачува дека делувањето на владата би можело да ја спречи „апокалипсата на работните места“ и да помогне да се искористи моќта на вештачката интелигенција за поттикнување на економски раст и кревање на животниот стандард. Карстен Јунг, економист во „IPRR“, рекол дека веќе постоечката генеративна вештачка интелигенција би можела да доведе до големи нарушувања на пазарот за работа или би можела значајно да поттикне економски раст. Во секој случај, претстојните промени ќе влијаат на милиони луѓе.
„Но, технологијата не е судбина и апокалипсата на работните места не е неизбежна – владата, работодавците и синдикатите имаат можност да донесат клучни одлуки кои обезбедуваат добро да управуваме со новата технологија. Ако наскоро не се реагира, може да биде предоцна“, порачал Јунг.
