Со првиот модел на "Audi 80" во 1972 година, внатрешно познат како „B1“, компанијата од Инголштад лансираше модерен и сигурен семеен автомобил. Овој модел е основа на сега исклучително популарната серија Б, која стана пионер на иновативната технологија и трендсетер. "Audi 80" беше првиот модел на марката со четири прстени што достигна продажба од милион единици, со повеќе од 12,5 милиони примероци произведени во сериите "B1" до "B9".

Основач на нов сегмент

"Audi 80" ја имаше својата светска премиера во 1972 година, годината на Летните олимписки игри во Минхен. Во јули истата година беше презентиран пред медиумите, а во септември на дилерската мрежа. Моделот "B1" ги постави темелите за нов пазарен сегмент на „компактни седани“.

Компактниот седан со средна големина ја заокружи гамата на "Audi" во тоа време. Иновативната технологија на овој модел, како што е модуларниот дизајн, значително придонесе за развојот на другите модели на групацијата "Volkswagen", вклучувајќи го и првиот "VW Passat". Неговиот четирицилиндричен мотор со "OHC" технологија беше исто така основа за "Golf" и "Scirocco". "Audi 80" го спаси "Volkswagen" за време на кризата во 1970-тите, станувајќи модел за масовен профит од 1990-тите па наваму, пишува Klix.ba.

Лесен и економичен

Под водство на главниот инженер Лудвиг Краус, секој дел од автомобилот беше дизајниран да ја намали тежината без да се загрози квалитетот и силата. Така, основниот модел "Audi 80" со две врати тежеше само 835 килограми, што заедно со малата потрошувачка на гориво го направи овој автомобил идеален за време на енергетската криза. Во 1973 година ја освои наградата Автомобил на годината.

Овој модел, исто така, стана платформа за иновации кои го одбележаа идентитетот на "Audi", вклучувајќи "TDI" мотори, "quattro" погон, "DSG" менувачи и спортски диференцијали. Неговите турбомотори со пет цилиндри ја поставија основата за првиот "RS" модел.

Технички иновации

Со меѓуоскино растојание од 2,47 метри и должина од 4,18 метри, "Audi 80" беше компактен и функционален. Моторите на погон на запчест ремен не бараа одржување и нудеа моќност од 55 до 100 коњски сили.

Милиони копии

Благодарение на новата генерација на "OHC" мотори, "Audi 80" стана продажен хит. До 1978 година беа произведени повеќе од милион модели "B1". Поради големата побарувачка, производството беше проширено во погоните на "Volswagen" во Волфсбург и Емден.

Во 1973 година, спортскиот потенцијал на серијата "B1" беше демонстриран со концептното купе "Asso di Picche", дизајнирано од Џорџо Џуџаро. Подоцна истата година, "Audi 80 GT" влезе во производство, а во 1975 година беше заменет со "Audi 80 GTE" со 110 коњски сили, што навестуваше за идната спортска насока на марката.

Еволуција на "Audi A4"

"Audi 80" се произведуваше во четири генерации (B1 до B4) до 1994/1995 година, кога беше заменет со "Audi A4" (B5). Со овој модел "Audi" воведува нова номенклатура. Последната генерација, "B9", е достапна во различни верзии.

"Audi 80" останува симбол на иновации и успех, зацврстувајќи го својот статус како клучен модел во историјата на автомобилската индустрија.