Облик на рак, Хочкиновиот лимфом може да се развие на која било возраст, но најчесто ги погодува луѓето на возраст меѓу 20 и 40 години, како и оние над 75 години. Студија од 2022 година посочува дека зголемувањето е особено забележливо кај помладата популација, иако причината за тоа сè уште не е позната
Хочкиновиот лимфом се развива во лимфниот систем, кој е дел од вашиот имунолошки систем и е мрежа од садови и жлезди распоредени низ телото. Еден од симптомите може да се појави дури и при консумирање алкохол.
Д-р Асиф Ахмед, општ лекар од Обединетото Кралство, сподели видео на „TikTok“ во кое апелира луѓето да не ги игнорираат симптомите.
„Кај Хочкиновиот лимфом, одреден тип на клетки, познати како Б-лимфоцити, ненормално се размножуваат“, објаснува докторот. „Овие клетки се собираат во одредени делови од вашето тело, најчесто во пазувите, вратот и препоните.“
Затоа, како што наведува, „најчест симптом“ е отечен лимфен јазол кој е воспален и зголемен, а не се повлекува.
„Обратете внимание на овие грутки, особено на вратот, пазувите или препоните“, додава д-р Ахмед. „Ако забележите лимфен јазол кој не исчезнува по четири до шест недели, посетете го вашиот лекар.
Исто така, укажува на други симптоми, како што се:
• постојана кашлица или отежнато дишење;
• покачена температура;
• губење на тежината.
Иако дијагнозата „може да биде доста брза“, според „NHS“, единствениот начин да се потврди е биопсијата. Оваа постапка вклучува земање примерок од ткиво на засегнатиот лимфен јазол, кој потоа се анализира во лабораторија.
Д-р Ахмед вели дека причината за Хочкиновиот лимфом не е целосно позната, но постојат фактори на ризик, вклучително:
ослабен имунолошки систем;
претходно заболување од заразна мононуклеоза;
семејна историја на болести.
„NHS“ исто така додава дека ризикот од развој на оваа болест се зголемува кај луѓето кои земаат имуносупресивни лекови.
„Третманот може да вклучува радиотерапија и хемотерапија, а прогнозата е одлична“, вели д-р Ахмед.
Иако овој рак е „релативно агресивен“ и може брзо да се прошири низ телото, тој е еден од најизлечивите видови на рак.
Општо земено, околу осум од 10 пациенти живеат најмалку пет години по дијагнозата, а повеќето од нив се целосно излечени.
Докторот нагласува дека токму затоа е важно болеста навреме да се дијагностицира и да се посети лекар доколку имате некој од факторите на ризик или симптоми.
