"Renault Twingo" добива брат: Наскоро уште еден мал и евтин електричен автомобил

Овие информации беа потврдени за време на онлајн состанок со инвеститорите на "Renault Group", при што беше соопштено и дека "Nissan" ќе биде ослободен од финансиските обврски кон проектот "Ampere", пренесува британскиот "Auto Express".

Овој мал електричен автомобил од А-сегментот ќе биде достапен за купувачите од 2026 година и во понудата на "Nissan" ќе се позиционира под новата генерација на "Micra", станувајќи почетен модел на јапонскиот производител.

Од "Renault Group" потврдија дека новиот автомобил ќе споделува околу 80 отсто од компонентите со идниот "Twingo".

Раководството на компанијата истакнува дека ова партнерство ќе го забрза процесот на излегување на возилото на пазарот и ќе му овозможи на "Nissan" со пониски трошоци да влезе во сегментот на мали електрични автомобили. Од друга страна, "Renault" преку оваа соработка ќе ја зголеми ефикасноста на користење на своите ресурси.

Со проектот "Ampere", "Renault" планира да го скрати времето за развој на "Twingo" од 21 на 16 месеци, што ќе влијае и врз развојот на идниот мал електричен модел на "Dacia".

Намалувањето на бројот на делови и оптимизацијата на производството треба да резултираат со 40% пониски трошоци за материјали во однос на "Renault 5". Иако ова не мора нужно да ја намали малопродажната цена, се очекува дека градскиот електричен модел на "Nissan" ќе има почетна цена од околу 20.000 евра.

Сè уште нема официјални информации за погонскиот систем и батеријата, но се очекува дека "Twingo" ќе користи батерија со капацитет од 40 kWh и електромотор со 120 коњски сили – истата погонска единица што ја користи "Renault 5". Слични спецификации се предвидуваат и за моделот на "Nissan", со досег од околу 322 километри.