Луѓето кои најголемиот дел од својата неделна физичка активност ја практикуваат за време на викендот, познати како викенд-воини, можат да го намалат ризикот од прерана смрт, срцеви заболувања и канцер на нивоа слични на оние кои редовно вежбаат во текот на целата недела. Клучот е неделно да ги достигнете препорачаните 150 минути умерена до интензивна физичка активност.

Имено, студијата објавена во „Journal of the American Heart Association“ ги анализирала податоците на повеќе од 93.000 возрасни лица од Обединетото Кралство. Учесниците биле поделени во три групи:

Викенд воини: најголемиот дел од нивната физичка активност ја извршуваат во еден до два дена во текот на неделата.

Редовно активни: активноста е распоредена во текот на целата недела.

Неактивни: не ја исполнуваат препорачаната минимална физичка активност.

Резултатите покажале дека двете активни групи имале значително помал ризик од смрт од сите причини, вклучително и кардиоваскуларни болести и канцер, во споредба со неактивните.

Д-р Жи-Хао Ли, водител на истражувањето од „Southern Medical University“ од Гуангжу, истакнал: „Не мора да вежбате секој ден за да останете здрави. Сè додека неделно имате 150 минути умерена до интензивна физичка активност, без разлика дали активноста е распоредена во текот на неделата или концентрирана на еден до два дена, можете значително да го намалите ризикот од смрт од кардиоваскуларни болести, канцер или други причини“.

Д-р Кит Дијаз од „American Heart Association“ додаде: „Многу луѓе тешко пронаоѓаат време за секојдневно вежбање. Сепак, ова истражување покажува дека дури иако сте активни само за време на викендот, можете да постигнете значителни здравствени придобивки“.

Препораки за безбедно вежбање

Иако резултатите се охрабрувачки, важно е да се спомене дека концентрирањето на сета физичка активност во еден или два дена може да го зголеми ризикот од повреди на мускулно-скелетниот систем.

Експертите советуваат постепено да го зголемувате интензитетот и времетраењето на вежбањето, секогаш добро да се загреете пред да започнете со физичка активност и да го слушате вашето тело како и да ги адаптирате активностите на вашите способности.