„Ќе мораме да го зголемиме бројот на автомобили што ги произведуваме во САД и веројатно да го префрлиме производството на уште еден модел во фабриката во Јужна Каролина“, рекол Самуелсон за „Bloomberg“.

Волво веќе ги произведува моделите „EX90“ и „Polestar 3“ во гореспоменатата фабрика во близина на Чарлстон, а Самуелсон вели дека раководството на компанијата ќе мора внимателно да размисли кои други модели би можеле да се произведуваат таму. Царините на Трамп од 25 отсто за увоз на автомобили во САД драстично ќе ги зголемат трошоците за странските компании и ќе ги нарушат синџирите на снабдување.

Продажбата во САД изнесува нешто помалку од 20% од вкупната продажба

Продажбата во САД изнесува нешто помалку од 20 отсто од вкупната глобална продажба на „Volvo Cars“. Од јануари до март оваа година, Волво продал 33.285 автомобили на американскиот пазар. Сè уште не е јасно како одлуката ќе влијае на работните места во Шведска, но според Хампус Енгелау, аналитичар во Ханделсбанкен, царините би можеле да доведат до отпуштања во Шведска.

„Со оглед на царините од 25 проценти, „Volvo Cars“ во САД ќе мора да го произведува она што го продава таму. Доколку автомобилите што сега се произведуваат во Европа почнат да се произведуваат во САД, јасно е дека ќе биде неопходно да се намали бројот на вработени и обемот на производство во Шведска“, рекол Енгелау.

Хакан Самуелсон нагласил дека целата автомобилска индустрија ќе биде темелно погодена: „Ќе бидеме сведоци на јасна регионализација и во таква ситуација едноставно треба да се приспособите. И тоа побрзо од конкуренцијата. Иако тоа не може да се направи преку ноќ, важно е да се дејствува брзо“.

„Волво е најбрзо растечки луксузен бренд во светот во 2024 година“

На состанокот на акционерите на „Volvo Cars“ учествувал и претседателот на управниот одбор на компанијата, Ли Шуфу. Тој директно не го спомнал преместувањето на производството, но рекол: „Загрижен сум за предизвиците со кои се соочува Volvo Cars и целата автомобилска индустрија. Активно подготвуваме мерки“.

Шуфу не го спомнал ниту претседателот Доналд Трамп ниту САД, туку само изјавил: „Пречките за трговијата и инвестициите стануваат сè поголеми. Мораме да се држиме до нашите првични намери“. Тој укажал на минатогодишните добри деловни резултати и додал дека Волво е луксузниот бренд со најбрз раст во светот во 2024 година, но и дека новата неизвесност веќе влијае на компанијата.