"Fiat" го „воскреснува“ својот легендарен модел
"Fiat Campagnola X" би можел да го означи враќањето на легендарниот теренец, а според италијанските медиуми, станува збор за „проект што ја комбинира авантуристичката ДНК на брендот со технолошката иновација од најновата генерација“.
Според гласините, со должина од приближно 4 метри, "Fiat Campagnola X" се истакнува како совршено компактно возило, способно да ги спои теренските перформанси од висока класа со практичноста погодна за урбана употреба.
Неговиот робустен дизајн е инспириран од естетиката на вистинските „off-road“ возила, со аголни линии, челични браници и видлива заштита на подвозјето. Препознатливи карактеристики се изразените лакови над тркалата, целосно "LED" фарови со светлосен потпис во форма на „U“ и можност за вадење на кровот.
Технички, возилото ветува напредни решенија. Можно е да користи платформа со висока цврстина, во комбинација со погон на сите четири тркала.
Клучни карактеристики се диференцијали со можност за блокирање и режими на возење прилагодени на различни подлоги, што го прави идеален придружник за совладување на тежок терен.
Гамата мотори би можела да вклучи хибридни или целосно електрични опции, со два мотора за оптимална контрола во сите услови.
Внатрешноста на "Fiat Campagnola X" е дизајнирана со акцент на функционалност и издржливост.
Материјалите се водоотпорни, контролите се физички и интуитивни, а централниот 10-инчен екран со "Uconnect" систем нуди практичност и лесна употреба. Просторот во внатрешноста е оптимизиран за максимална флексибилност, со многубројни прегради за складирање и модуларен багажник.
Новата "Fiat Campagnola X" е позиционирана во стратешки сегмент на пазарот, нудејќи се како подостапна алтернатива на модели како "Jeep Wrangler" или "Suzuki Jimny." Иако нема конкретни информации кога "Campagnola X" ќе пристигне на пазарот, се очекува да има пред сè конкурентна цена.
