"Slate", стартап за електрични возила поддржан од основачот на "Amazon", Џеф Безос, соопшти во понеделникот дека има над 100.000 резервации за својот пристапен електричен пикап.

„Искрено сме благодарни за реакцијата на Американците по лансирањето на брендот "Slate" и нашиот пикап модел,“ изјави Џереми Снајдер, комерцијален директор на компанијата, за "TechCrunch".

„Возбудени сме за она што следува“

Овој значаен успех доаѓа само две недели по претставувањето на моделот чија крајна цена, со вклучени федерални субвенции, треба да биде под 25.000 долари.

Огромниот интерес покажува дека постои значителна побарувачка за едноставни и достапни работни возила – сегмент кој практично недостасува на американскиот пазар.

Резервациите не се исто што и продажба, но …

Секако, резервациите не значат автоматски и продажба.

На пример, "Cadillac" тврдеше дека има резервации за 18 месеци производство на моделот "Celestiq", но подоцна се покажа дека се продадени помалку од 25 возила.

Слично, "Fisker" изјави дека има над 60.000 резервации за "SUV" моделот "Ocean", но на крајот продаде само неколку илјади примероци пред да банкротира.

Дури и "Tesla" наводно имала над еден милион резервации за "Cybertruck", но по околу 50.000 продадени примероци, голем број возила останале на лагер, непродадени.

Зошто "Slate" можеби ќе биде поинаков

За разлика од горенаведените примери, пикапот на "Slate" изгледа како пореален и попрактичен производ.

Ниската цена и едноставниот дизајн го прават привлечен за многу поширока група купувачи.

Дополнително, купувачите нема да мора да чекаат премногу долго. "Slate" најави дека нивната фабрика во Индијана ќе има капацитет за производство до 150.000 возила годишно, почнувајќи од 2027 година.

Сериското производство треба да започне веќе следната година, а дотогаш заинтересираните можат да го посетат конфигураторот на нивната веб-страница, каде можат да изберат меѓу три каросериски верзии и десетици дополнителни опции и опрема.