Бразилскиот напаѓач на Реал Мадрид, Винисиус Жуниор, денеска даде изјава во рамките на истрагата за инцидентот што се случи на почетокот на 2023 година, кога кукла со неговиот лик беше обесена од мост во Мадрид, непосредно пред градското дерби со Атлетико.
Винисиус, кој сведочеше преку видеолинк, изјави пред судот дека бил „навреден и повреден“ кога дознал за настанот.
Тој го опиша чинот како расистички и додаде дека тогаш стравувал за безбедноста на своето семејство.
🧑⚖️ Vinicius declara en el juicio por el muñeco que colgaron en un puente con su camiseta.
— El Chiringuito TV (@elchiringuitotv) May 19, 2025
📹 @ElisaLassoM pic.twitter.com/9mhyDFhXCq
„Тоа беше многу тажен ден за мене. Не знаев што значи тој гест и дали моето семејство е безбедно“, рече 23-годишниот Бразилец.
Четворица мажи се обвинети дека на мост над сообраќајница во близина на тренинг-кампот на Реал Мадрид обесиле кукла облечена во дресот на Винисиус, со транспарент на кој пишувало „Мадрид го мрази Реал Мадрид“.
Иако судскиот процес сè уште не започнал, исказот на Винисиус е однапред прибран, бидејќи на 16 јуни – кога започнува судењето – тој ќе биде во САД, каде што Реал ќе настапува на Светското клупско првенство на ФИФА.
