Изминатите денови сме сведоци на исклучително променливо време. Сончевите и дождливите периоди се менуваат, се менуваат и температурите – од потопло кон посвежо, а сето тоа влијае врз нашето здравје и општа благосостојба. Особено страдаат метеоропатите. Во продолжение дознајте како да ги препознаете симптомите кои укажуваат дека припаѓате на оваа група.

Кои се метеоропатите?

Метеоропати се лица кои се почувствителни на временските услови и многу поостро ги доживуваат сите промени во атмосферата. Бројот на вакви луѓе постојано расте. Се проценува дека повеќе од половина од популацијата искусува симптоми на метеоропатија. Иако не се смета за болест, тегобите поврзани со временските промени може да бидат вродени или да се појават со текот на времето.

Најчесто се погодени постари лица, како и оние со хронични заболувања — особено кога станува збор за срцевите проблеми, при што симптомите стануваат поизразени. Жените почесто пријавуваат непријатности поврзани со временските услови отколку мажите.

Симптоми

Најчестите симптоми на метеоропатија се:

• влошена општа состојба

• слабост

• замор

• поспаност

• намалена концентрација

• главоболки

Кај лицата со срцеви заболувања, временските промени можат да предизвикаат варијации во крвниот притисок и нарушувања на срцевиот ритам. Од друга страна, кај луѓе кои страдаат од чир на желудник, ревматизам, алергии, дијабетес или астма, доаѓа до влошување на симптомите на нивните болести.

Златен совет за метеоропатите

Метеоропатите треба да обрнат особено внимание на исхраната. Најдобар избор се лесно сварливи намирници богати со витамини и минерали. Витамините од групата B се особено важни за организмот на лице кое страда од временски влијанија, бидејќи се клучни за правилно функционирање на нервниот систем. Тие, исто така, го намалуваат заморот и ги ублажуваат симптомите на стрес.

Овие витамини се присутни во: јаткасти плодови, производи од житарки, овесни снегулки, банани, компири, зелка, риба и месо. Уште еден важен елемент е магнезиумот, кој смирува, ја зголемува отпорноста на стрес и го регулира срцевиот ритам. Богати извори на магнезиум се: семки од тиква, ореви, интегрални житарки, гриз, мешунки и банани.

Дополнително, спиење од 7 до 8 часа може значително да помогне во намалување на симптомите поврзани со оваа состојба.