На видеото се гледа жена која се расправа со стјуардеса, додека кенгурот трпеливо чека. Тема на расправата е токму кенгурот – дали да му се дозволи лет?

Дали видеото е вистинито?

Не – видеото е генерирано со вештачка интелигенција.

Иако изгледа застрашувачки реалистично, видеото не е автентично. Ниту еден кенгур не бил донесен на аеродром, ниту добил карта за лет. Целата сцена е создадена со помош на "AI" технологија.

Се чини дека видеото првично било објавено пред два дена на "Instagram" профилот "Infinite Unreality", кој е целосно посветен на бизарни видеа генерирани со вештачка интелигенција. Меѓу другите објави има и снимки од нилски коњ врзан за седиште во авион, жирафа која се качува на лет и прасе во детска количка.

Кенгурот стана вирален

Иако видеото е вештачки креирано, успеа да измами многу корисници. На "Instagram" има повеќе од 10 милиони прегледи, со безброј коментари воодушевени од „слаткиот кенгур“.

„Начинот на кој ја држи картата и чека да ја скенираат“, стои во еден коментар. „Има подобри манири од повеќето возрасни кои се качуваат во авион“, додал друг.

Видеото беше споделено и на платформата X (поранешен Twitter), каде собра речиси 3 милиони прегледи и илјадници реакции – вклучително и од авио-компанијата "Ryanair".

Овој вирален клип повторно ја отвори расправата за сè поголемиот реализам на содржини креирани со вештачка интелигенција и леснотијата со која вакви видеа можат да ги измамат гледачите. Ова е само уште еден пример колку денес е тешко да се разликува реалната снимка од вештачки создадена.