Веројатно ни најголемите оптимисти во "Xiaomi" не можеа да замислат подобро сценарио за влез на нивната компанија на пазарот на електрични автомобили. Нивниот прв модел, "SU7", ја воодушеви целата индустрија и постави солидна основа за иднината. По огромниот продажен успех на таа лимузина, редот дојде и за "SUV" моделот – за некои, најочекуваниот автомобил на годината.

Со моделот "YU7", кој беше јавно претставен оваа недела, амбициите на "Xiaomi" се уште поголеми – овој "SUV" директно го предизвикува најпопуларниот електричен автомобил на светот, "Tesla Model Y". Возилото комбинира напредни спецификации и висока технолошка интеграција, сето тоа со почетна цена од нешто над 30.000 евра (пресметано според кинеската цена во европски вредности).

Дизајн инспириран од "Ferrari" и перформанси од суперспортски автомобил

Најмногу внимание привлекува неговиот спортски и елегантен дизајн, кој многумина го споредуваат со "Ferrari Purosangue". Со должина од речиси 5 метри, ширина од 1,96 m и висина од 1,6 m, "YU7" нуди импресивно присуство на патот.

Под хаубата, "YU7" доаѓа во три изведби. Најсилниот модел, "YU7 Max AWD", располага со погон на сите четири тркала и вкупна сила од 508 kW (690 коњски сили). Забрзувањето од 0 до 100 km/h трае само 3,23 секунди, а максималната брзина изнесува 253 km/h. Сето тоа по цена од под 40.000 евра на кинескиот пазар.

Основниот модел, "Standard", има заден електромотор со 320 коњски сили и забрзување до 100 km/h за нешто под 6 секунди, по цена од околу 30.000 евра. Верзијата Pro со два мотора и 4×4 погон нуди речиси 500 коњски сили и забрзување до 100 km/h за 4,7 секунди, со цена од 33.300 евра.

Технологија достапна за сите

Сите изведби поддржуваат брзо полнење. Моделите "Standard" и "Pro" се опремени со "LFP" батерија од 96,3 kWh, која обезбедува досег до 853 km, односно 770 km кај моделот со 4×4 погон. Врвниот модел располага со батерија од 101,7 kWh, која може да се наполни од 10% до 80% за 12 до 21 минута, нудејќи досег до 760 km.

Луксузна внатрешност и практичност

Внатрешноста доминира со огромен "HyperVision" панорамски екран, преку кој се управува со сите функции. Возилото има 25 звучници, висококвалитетни и удобни седишта, а како опција може да се додаде и вграден фрижидер од 4,6 литри.

Безбедноста е на високо ниво – тука се "LiDAR" сензори и систем за помош при возење. Багажниот простор изнесува 687 литри назад и 141 литар напред, а со спуштање на задните седишта се добива вкупен капацитет од 1.758 литри.

Како што објаснуваат од "Electrek", "YU7" е пример за тоа како напредната технологија може да биде достапна за пошироката маса, и токму тоа ги загрижува западните производители. Кинеските електрични автомобили, со конкурентни цени и врвна опременост, стануваат сè поголема закана за доминацијата на западните брендови на глобалниот пазар.

Повеќе фотографии можете да погледнете ТУКА!