"Volvo EX60" ќе биде електрична алтернатива на популарниот, но веќе застарен модел "XC60".
Понудата на електрични возила од "Volvo" веќе ги вклучува моделите "EX30", "EX40" (поранешен "XC40 Recharge"), "C40" и "EX90". Од неодамна е тука и "ES90", замислен како ривал на "BMW i5". Наскоро, на оваа "EV" фамилија ќе ѝ се придружи и уште еден модел – "EX60".
"EX60" првпат беше прикажан во форма на глинен модел за време на претставувањето на "ES90" во март. Новиот SUV ќе биде електрична замена за сегашниот "XC60", кој сè уште се смета за привлечен, иако е веќе подолго време на пазарот.
"Volvo" на социјалните мрежи објави фотографија од задното светло на "EX60" – дизајнот е коцкаст, со препознатлив LED потпис кој се протега долж задните столбови – визуелен белег на SUV моделите на "Volvo".
Во објавата се наведува и дека "EX60" е целосно софтверски дефинирано возило, дизајнирано така што ќе може да се развива со текот на времето.
Од компанијата додаваат:
„Volvo EX60 не е само SUV од средна класа – тоа е иднината. Доаѓа на почетокот на 2026 година.“
Иако засега не се откриени многу технички детали за "EX60", познато е дека ќе биде првиот модел кој ќе ја користи новата скалабилна "SPA3" платформа, унапредена верзија на SPA2, која се користи кај моделите "EX90" и "ES90".
Спецификациите на погонските системи сè уште не се потврдени, но се претпоставува дека ќе бидат слични со оние кај "ES90".
Се очекува моделот да биде достапен во верзии со еден и два мотора. Доколку користи батерија со капацитет од 102 kWh, како "ES90", дометот би можел да достигне околу 644 километри.
Со поддршка за брзо "DC" полнење, батеријата ќе може да се надополнува многу брзо – примерот "ES90" поддржува до 350 kW, што овозможува до 300 km домет за само 10 минути полнење.
На почетокот од јуни, "Volvo" најави и дека "EX60" ќе биде првиот модел со новиот мулти-адаптивен безбедносен појас.
Овој систем користи сензори за да ја детектираат висината, тежината и обликот на патникот, а во случај на судар, ја приспособува силата на затегнување според конкретниот профил на лицето.
