Британската кралска ковница издаде комеморативни монети по повод 50-годишнината од постоењето на хеви метал групата „Ајрон Мејден“, пренесува „Би-би-си“.
Тие им се придружија на другите уметници во серијата монети „Музички легенди“ на Кралската ковница, која исто така издаде монети во чест на бендот „Квин“, Елтон Џон и Дејвид Боуви.
Дизајнот на новите монети, создаден од уметникот Алберт Акирант Квирантес, го прикажува фронтменот на бендот, Еди, во динамична поза. Скриени референци се вклучени во дизајнот на монетата, истакнувајќи различни албуми и турнеи.
Со 17 студиски албуми издадени низ годините, „Ајрон Мејден“ собраа лојална база на обожаватели од целиот свет.
Род Смолвуд, менаџерот на „Ајрон Мејден“, изјави: „Ликот на Еди на официјалната британска монета е продолжение на неговата неверојатна одисеја откако го создадовме во 1980 година.“
„Бевме на поштенски марки, шишиња пиво, опашки од авиони, а сега сме законско средство за плаќање. Деталите што Акирант успеа да ги спакува во дизајнот се извонредни, има мали алузии на речиси секое поглавје од нашето патување како бенд. Навистина сме почестени што Кралската ковница на пари одлучи да одбележи 50 години од „Ајрон Мејден“ на толку уникатен начин.“
Монетите можат да се купат во Кралската ковница од вторник, во златни и сребрени верзии и во издание кое не е во оптек. Цените за монета од „Ајрон Мејден“ се движат од 18,50 фунти за монета со номинална вредност од пет фунти, до златната монета со номинална вредност од 200 фунти, која е достапна за 6.940 фунти.
