Ако отсекогаш сте сонувале за живот во Франција, постојат места, особено помали населби кои се соочуваат со иселување или економски предизвици, што осмислуваат креативни начини за да привлечат нови жители.
Без разлика дали станува збор за евтина продажба на куќи, финансиски стимулации за доселување или уникатни културни манифестации – секоја заедница има свој начин да ја раскаже својата приказна и повторно да ја оживее локалната средина, пренесува "Večernji.hr".
Во последните неколку години, неколку мали италијански гратчиња станаа вест на насловните страници нудејќи напуштени куќи за едно евро – со цел да ја зголемат опаѓачката популација и да внесат нов живот во празните села.
Сега, оваа иницијатива се прошири и надвор од границите на Италија. Тивок француски град, Амбер, лоциран на југоистокот на земјата, стана најновата заедница што ја прифати оваа стратегија во надеж дека ќе го запре натамошното намалување на бројот на жители, кои моментално се околу 6.500, пишува "Daily Mail".
Овој потег е дел од поширок петгодишен план за привлекување нови жители и подмладување на локалното население. Во еден дел од градот, процентот на празни недвижнини достигнал 60%, што ги поттикнало властите да понудат две празни куќи по симболична цена од едно евро.
Се чини дека проектот веќе дава резултати – пред две години во училиштето во Амбер беше отворено ново одделение поради зголемениот број запишани ученици.
Дополнително, историската зграда на градската комора за трговија и индустрија моментално се реновира, а нејзиното повторно отворање е планирано за 2026 година како јавен простор, што треба да донесе нови работни места за локалното население.
Сепак, како и кај сличните програми во Италија, понудата за куќи по едно евро доаѓа со строги услови и правила.
Иако почетната цена е недвосмислено поволна, од купувачите се очекува значително да инвестираат во реновирање и да исполнат конкретни услови доколку сакаат да ги добијат клучевите.
Најпрво, не е дозволено да се купи втора куќа преку оваа програма. Лицата што ќе купат куќа за едно евро во Амбер мораат да се обврзат дека ќе живеат постојано во таа недвижнина најмалку три години откако ќе стане вселива.
Во спротивно, ризикуваат финансиски казни, вклучувајќи и враќање на сите државни субвенции добиени за обновата. Причината за оваа регулатива е оправдана – бидејќи куќите бараат обемни градежни работи. Потенцијалните купувачи дури може да бидат замолени да достават пишан план во кој ќе го наведат обемот на работите и временската рамка потребна за нивното завршување.
Денес
