Луис Енрике му одржа лекција на шпански новинар по финалето во Њу Џерси

Шпанскиот стручњак образложи дека намерата му била да го расчистува хаосот, а не да го удри Жоао Педро, но откако ја стави оваа ситуација во втор план, мораше да одговара доста нервозно и на едно провокативно новинарско прашање.

Претставникот на „Марка“ во своето поставено прашање го употреби зборот „губитник“, нешто што воопшто не му се допадна на Лучо кој испорача говор во свој стил.

– Губитник? Ние не сме губитници, ние сме вицешампиони. Ова е спорт на највисоко можно ниво и ние не сме губитници. Губитници се оние кои се откажуваат и кои не се враќаат после зададен удар. Не би го користел тој збор на ова ниво, – изјави Луис Енрике и додаде.

– Во деликатните моменти знаете кои луѓе се на ваша страна, а кој не. Јас од мали нозе имам посебни карактеристики и стојам многу добро со сите кои ме познаваат. Можеби за некој сум егоцентричен, но и тоа е сосема во ред, – изјави Луис Енрике.