Компанијата е под притисок од гостите кои се борат со инфлацијата и високите цени на храната. Некои оброци во рестораните на „McDonald’s“ предизвикаа големо внимание на интернет, бидејќи на одредени локации цената надминуваше 18 долари. Џо Ерлингер, претседател на американските операции на „McDonald’s“, се огласи со отворено писмо поради негодувањата, нагласувајќи дека цената од 18 долари е исклучок, а не правило.
Продажбата во САД закрепна во последниот квартал по два последователни периода на пад, благодарение на серија нови промоции, но бројот на посети остана нерамномерен. Според податоците на аналитичката фирма „Placer“, акции како „Snack Wrap“ за 2,99 долари, вратен ова лето по пауза од десет години, донеле двоцифрен раст на посетеноста во првите три дена. Менаџерите се надеваат дека поевтините оброци во рамки на комбинираните менија ќе успеат да го повторат истиот ефект во поширок обем.
Според „Wall Street Journal“, оброк кој досега чинел 10 долари би можел да поевтини на 8,5 долари во рамки на новиот ценовник, кој треба да стапи во сила во септември и да важи до почетокот на 2026 година. „McDonald’s“ исто така планира и промотивни понуди во ограничен период – како појадок со сендвич за 5 долари или оброк со „Big Mac“ или „McNuggets“ за 8 долари.
„Купувачите ни порачуваат дека им е потребна поголема достапност и поповолни цени, што е и одлика на ’McDonald’s‘ брендот“, наведе Ерлингер во интерна порака на почетокот на месецов. Компанијата ќе им помогне на франшизерите да ги покријат загубите од поевтините комбинирани менија, а ќе го финансира и маркетингот на акциите кои ја оживуваат ознаката „Extra Value Meal“, првпат воведена во 1991 година.
Менаџерите им порачаа на инвеститорите дека купувачите со пониски приходи сè почесто јадат дома, додека оние со повисоки примања почесто ги посетуваат рестораните. „Најголемиот фактор кој ја обликува перцепцијата за вредноста на ’McDonald’s‘ кај потрошувачите е таблата со менито“, изјави неодамна извршниот директор Крис Кемпчински.
Во последните години „McDonald’s“ се потпираше на промотивни соработки, како „Happy Meal“ со мотиви од играта „Minecraft“ или партнерството со групата „BTS“, за да остане културолошки релевантен. Сепак, синџирот верува дека намалувањето на цените на комбинираните менија ќе ги потсети гостите зошто воопшто почнале да доаѓаат.
