Оливер Гласнер му обезбеди трофеј во ФА купот и Суперкупот на Кристал Палас, но раководството не ги следеше овие резултати со соодветни потези во преодниот рок.
Наместо тоа, лондонскиот клуб е соочен со губење на Еберечи Езе во финишот на преодниот рок, а веројатно ќе остане и без најдобриот дефанзивец, Марк Геи.
Гласнер потенцирал дека Геи мора да остане барем за реваншот со Фредрикштад од плејофот за Конференциската лига.
– Многу доцниме во преодниот рок, имаме десет дена да најдеме соодветни замени.
– Во моментов имаме 17 фудбалери на располагање, еден е од академијата, а на двајца веќе им кажавме да си бараат нови клубови. Значи остануваме 14 играчи, а имаме шест натпревари до крајот на месецот.
– Сигурен сум дека ако Марк замине и не биде во комбинација за дуелот со Фредрикштад, ќе имаме големи проблеми. Не можеме да регистрираме друг фудбалер и според мене, мора да остане. Ако замине, ќе мора јас да облечам копачки, па бидејќи бев стопер, да се обидам да му помогнам на тимот, – рекол Гласнер.
Денес
