„Tesla“ го "уби" најевтиниот „Cybertruck“ – никој нема да жали по него

Кога Илон Маск во 2019 година го претстави „Cybertruck“, најави дека купувачите ќе можат да добијат варијанта со еден мотор и погон на задните тркала по почетна цена од 39.900 долари – без субвенции и попусти. Но, тој план никогаш не се реализира, иако "RWD" моделот официјално беше воведен дури во април оваа година.

„Cybertruck Long Range RWD“ имаше почетна цена од 69.990 долари, без федералната субвенција за електрични возила од 7.500 долари. Со таа погодност, цената изнесуваше 62.490 долари, што сепак тешко може да се нарече „поволно“ кога станува збор за „Tesla“ пикап. Дополнително, и оваа субвенција истекува на 30 септември, што уште повеќе го правеше купувањето на оваа варијанта бесмислена. На крајот, моделот чинеше дури 10.000 долари повеќе од ветеното за 2023 година.

Купувачите на „Cybertruck RWD“ мораа да се откажат од бројни клучни опции што ги нуди поскапата верзија со два мотора и погон на сите тркала (AWD), чија цена стартува од 79.990 долари.

"RWD" верзијата развиваше 315 коњски сили и 494 Nm вртежен момент, со забрзување од 0 до 100 km/h за 6,2 секунди и максимална брзина од 180 km/h. За споредба, AWD „Cybertruck“ испорачува 600 коњски сили и 847 Nm, забрзува за 4,1 секунда и постигнува речиси иста максимална брзина.

Освен значително послабите перформанси, купувачите на "RWD" моделот мораа да прифатат и компромиси во опремата: наместо електричен капак за товарниот простор добиваа опционална мека церада, немаше приклучоци во товарниот дел, а адаптивното воздушно потпирање беше заменето со класични пружини. Со тоа се намали носивоста од 1.134 на 910 килограми, а влечната моќ од 3.400 на 2.000 килограми.

И внатрешноста беше „поскромна“ – седиштата беа обложени со ткаенина наместо со синтетичка кожа, греењето беше достапно само во предниот ред (без вентилација), задните патници остануваа без екран, а аудиосистемот имаше само седум звучници, наспроти 15-те во AWD варијантата.