По долго размислување и евалуација, стручното жири го прогласи германскиот град Хајлброн за нова „Зелена престолнина на Европа“ за 2027 година.
Без разлика колку пиеме од непријатни хартиени сламки или рециклирана пластична амбалажа, секогаш нѝ се чини дека тоа не е доволно. Вистинската промена мора да дојде на многу повисоко ниво – од цели градови посветени на одржливоста. За среќа, такви градови постојат, а Европските награди за зелени градови беа воспоставени токму за да се препознаат нивните напори, пишува „Тајм аут“.
Наградите се доделуваат од 2010 година, кога Стокхолм стана првата „зелена престолнина“ на Европа. Нордиските градови обично доминираат на листите за одржливост, како што е Глобалниот индекс за одржливи дестинации (GDS), но наградите за зелени градови ги признаваат успесите низ целиот континент.
Градовите се објавуваат две години однапред, а победникот за 2027 година штотуку беше објавен на голема церемонија во Вилнус, главниот град на Литванија, кој моментално ја држи титулата. Победниците ги избира стручно жири кое го зема предвид квалитетот на воздухот, посветеноста на зелената енергија и плановите или програмите за одржлив развој што веќе се во тек.
По внимателно разгледување, жирито го прогласи германскиот град Хајлброн за „Зелена престолнина на Европа“ за 2027 година.
Хајлброн е прилично мал град, познат по својата прекрасна архитектура и километри лозја. Градот веќе долго време спроведува еколошки иницијативи, а судиите биле особено импресионирани од неговиот сеопфатен пристап кон одржливо урбано планирање и „амбициозните цели за 2035 година“.
Моментално се спроведуваат два големи проекти – „Landschaftsplan 2030“ (План за пејзаж 2030) и „Mobilitätskonzept“ (Концепт за мобилност) – двата насочени кон подобрување на квалитетот на воздухот и намалување на бучавата како единствен, поврзан проблем.
Според Европската комисија, Хајлброн усвоил стратегија која препознава дека „вклученоста на граѓаните е клучна“ за подобрување на животната средина во градот и поширокиот регион. Градот вовел „платформи за учество на граѓаните, кампањи за подигање на свеста и заштита на мирните зони“ за активно вклучување на жителите во неговите планови.
Градот освои 600.000 евра за спроведување „мерки за одржливост и учество на граѓаните“ во текот на следните две години.
Исто така два града беа прогласени и за победници и ја добија наградата „Европски зелен лист“, која се доделува на помали градови и места со помалку од 100.000 жители, како признание за нивните достигнувања во областа на заштитата на животната средина.
Асен во Холандија и Сиена во Италија се овогодишните добитници на „Зелен лист“, а секој од нив доби по 200.000 евра од Европската комисија. Асен го импресионирал жирито со иновативните политики за управување со отпад, вклучително и подобрено собирање на PMD отпад (пластична, метална и картонска амбалажа за пијалаци) и иницијативи како што се „Кафулиња за поправки“, каде што граѓаните можат да донесат расипани предмети а локални волонтери ги поправаат.
Сиена, од друга страна, рециклира 61 отсто од вкупниот отпад и изгради бројни нови градски паркови, постигнувајќи просечно 28 квадратни метри јавен зелен простор по жител.
