Дизајнерот на чевли и претприемач Чезаре Пачоти почина на 69-годишна возраст. Деталите за причината за смртта не се објавени.
Во соопштението издадено во неделата навечер се наведува дека Пачоти починал во местото Чивитанова Марке, во централна Италија, опкружен со своето семејство и децата.
Заедно со својата сестра Паола, дизајнерот „испиша една од клучните страници во историјата на италијанските чевли“, стои во соопштението.
„Иконичниот бодеж со шпиц, симбол на брендот, ќе остане како израз на идентитет и храброст. Пачоти ќе се памети по заводливиот стил и исклучителната човечка дарежливост“.
Брендот „Cesare Paciotti“, кој го носи неговото име, е познат по сексапилните и женствени модели на обувки. На Модната недела во Милано минатиот месец, препознатливата потпетица во форма на бодеж повторно беше во центарот на вниманието, додека брендот уште еднаш го нагласи своето наследство.
Компанијата ја основале неговите родители во 1948 година, во Чивитанова Марке – еден од главните италијански центри за производство на обувки – со цел да создаваат рачно изработени, занаетчиски чевли.
Пачоти го лансираше истоимениот бренд во 1980 година и го претвори во препознатливо име на меѓународната модна сцена. Благодарение на остро обликуваните потпетици и иновативните дизајни, привлече бројни познати личности, меѓу кои и Бијонсе и Парис Хилтон. Сандалите и чизмите со крзно или украсени со кристали станаа вистински хит, а брендот редовно учествуваше на Модните недели во Милано и Париз.
Во 2007 година, дизајнерот ја претстави и целосната линија на облека под ознаката „Paciotti 4US“, со што дополнително го прошири модното царство што сам го изгради.
