„WhatsApp“ воведува ново ограничување: Апликацијата ќе ве блокира доколку го направите ова
„WhatsApp“ се обидува да го реши проблемот со спам-пораки на својата платформа со ограничување на бројот на пораки што индивидуалните корисници и бизнисите можат да ги испратат до непознати лица без да добијат одговор.
Иако апликацијата започна како едноставен начин за испраќање пораки до лични контакти, со текот на времето стана посложена – со групи, заедници и деловни пораки. Со овие промени, луѓето сега добиваат повеќе пораки од кога било досега, што го отежнува следењето на истите.
Сите пораки што корисниците и бизнисите ги испраќаат до други ќе се пресметуваат во ова ново месечно ограничување, освен ако добијат одговор. На пример, ако се запознаете со некого на конференција и му испратите три пораки, тоа ќе се смета во ограничувањето, пишува „TechCrunch“.
„WhatsApp“ сè уште не објави точно колку ќе изнесува лимитот, бидејќи во моментов тестира различни ограничувања.
Меѓутоа, кога бизнис или поединец ќе се приближи до ограничувањето, апликацијата ќе прикаже предупредување во форма на скокачки прозорец со бројач, за корисниците да можат да избегнат забрана за испраќање пораки.
Компанијата изјави за „TechCrunch“ дека ова тестирање ќе биде активно во повеќе земји во наредните недели. Исто така, наведе дека просечните корисници обично нема да го достигнат лимитот и нивното искуство со испраќање пораки нема да биде засегнато. Наместо тоа, контролата е дизајнирана да биде ефикасна против поединци и бизниси кои испраќаат масовни пораки и спам на корисниците.
