Кина се подготвува да ги укине субвенциите за електрични и хибридни возила — потег што веќе предизвика еден од најголемите бранови на купување оваа година.
Како што целосното даночно ослободување ќе престане да важи на 31 декември 2025 година, авто-салоните низ целата земја бележат рекорден број нарачки, пренесува „Sina Finance“.
Од 1 јануари 2026 година, купувачите на целосно електрични возила повеќе нема да добиваат 100% даночно ослободување, туку само 50%. Во моментов, можно е ослободување од данок во износ до околу 3.800 евра, но тој износ ќе се преполови.
Експертите истакнуваат дека тајмингот на промената — кој се совпаѓа со традиционалниот период на попусти кон крајот на годината — предизвикал вистинска „куповна треска“. Некои дилери пријавуваат раст на нарачки и до 60% во однос на вообичаените месечни нивоа.
Од Асоцијацијата на кинески авто-дилери појаснуваат дека оваа промена не е само фискална, туку и индустриска порака: целта е пазарот на електрични возила (EV) да се насочи од „ценовна“ кон „вредносна конкуренција“.
Во октомври 2025 година, кинеските министерства ги заострија критериумите за возилата кои можат да користат даночни поволности. Така, на пример, „plug-in“ хибридите и моделите со продолжен досег сега мора да имаат електричен опсег од најмалку 100 километри, пренесува „Carnewschina“.
За да го ублажат преминот, бројни производители воведоа т.н. „гаранција на даночна разлика“ за купувачите кои ќе нарачаат возило до крајот на ноември 2025 година, а ќе го преземат во 2026 година — покривајќи ја разликата во даночниот износ.
Од 2014 година, целосните даночни олеснувања беа главен двигател на експлозивниот раст на кинескиот пазар за електрични возила. Останува да се види како новите мерки ќе влијаат на идните одлуки на купувачите.
Денес
