Младите во страв од AI технологијата сè повеќе се свртуваат кон занаетите: „Робот сè уште не може да одзатне WC-школка“

Една од нив е ученичката Марина Јарошенко, која како и сè поголем број луѓе во оваа земја, одлучила да избере занает и сега се обучува за водоинсталатерка.

„Тоа е нешто што вештачката интелигенција нема да го преземе“, вели Јарошенко, која потекнува од Украина и студира на „City of Westminster College“ („CWC“) во Лондон.

Канцелариските работни места се сметаат за поранливи на влијанието на вештачката интелигенција и автоматизацијата отколку рачните работи. Во Велика Британија, секој шести работодавец очекува дека употребата на AI алатки ќе овозможи намалување на бројот на вработени во следните 12 месеци, според анкетата спроведена минатиот месец од „Chartered Institute of Personnel and Development“, професионално тело за човечки ресурси.

Јарошенко смета дека вештачката интелигенција е корисна алатка, но не и нешто што може да ја замени практичната природа на водоинсталатерството, професија што многумина ја избегнуваат поради физичките напори и предрасудите кон занаетите како што се електроинсталациите, столарството и заварувањето.

„CWC“, кој е дел од „United Colleges Group“, е институција за понатамошно образование и обука, а не универзитет. Во последните три години, уписите на инженерските и градежните курсеви се зголемени за 9,6 проценти — раст што извршниот директор Стивен Дејвис го поврзува, делумно, со порастот на вештачката интелигенција, но и со загриженоста на студентите околу високите трошоци за студирање на универзитетите.

Анџела Џојс, извршна директорка на „Capital City College“ во Лондон, изјави дека забележале силен раст на интересот за градежни професии, водоинсталатери, угостителство и други занаети.

„Ова покажува дека сè повеќе луѓе ја препознаваат вредноста на станувањето квалификувани професионалци“, рече Џојс, додавајќи дека за некои луѓе, учењето преку пракса може да понуди подобар потенцијал за заработка отколку дипломите.

Дејвис изјави дека вештачката интелигенција не ги натерала да размислуваат стратегиски само младите, туку и возрасните кои сакаат да ја сменат кариерата.

Според податоците на британската Канцеларија за национална статистика, водоинсталатерите заработуваат во просек 37.881 фунта (50.169 долари) годишно, додека квалификуваните градежни работници обично заработуваат околу 35.764 фунти, во споредба со просечната плата од 39.039 фунти во сите сектори.

Дејвис напомена дека квалификуваните занаети често нудат поголеми можности за луѓето да отворат сопствен бизнис, со што го зголемуваат својот потенцијал за заработка.

„Понекогаш водоинсталатерите мора да ги стават рацете во WC-школката за да ја одзатнат, а јас сè уште немам сретнато робот што го прави тоа наместо нас“, рече Дејвис.