Токму затоа, новото истражување спроведено од порталот „Time Out“ нуди интересен увид во тоа каде денес се живее најскапо, а каде најповолно, барем кога станува збор за излегувања, забава и општествен живот.

За какво истражување станува збор?

Во рамки на своето годишно истражување за најдобрите светски градови, „Time Out“ ги собрал мислењата на повеќе од 18.000 жители од над сто градови ширум светот. Испитаниците оценувале колку им се финансиски достапни секојдневни активности како одење во ресторан, кино или театар, пиење кафе, посета на концерти, пијалак во барови и вечерни излегувања. Врз основа на одговорите, кои ги опишувале како евтини, бесплатни или едноставно пристапни, била составена листа на градови во кои животот – барем кога станува збор за излегувања и општествени навики – е најскап, но и на оние во кои сè уште може да се ужива без преголеми трошоци.

Титула на најскапиот град ја понесе јужнокорејската престолнина

Според мислењето на самите жители, незавидната титула најскап град ѝ припадна на јужнокорејската престолнина Сеул. Само 30 проценти од испитаниците сметаат дека одењето во ресторан таму е финансиски прифатливо, додека вечерните излегувања како достапни ги гледаат само 21 процент од граѓаните. Ниту пијалакот во бар не носи големо олеснување за домашниот буџет, бидејќи само нешто повеќе од една четвртина од испитаните го опишуваат како евтин.

Високо на листата на најскапи градови се најде и Осло, кој со години има репутација на еден од најскапите европски градови. Резултатите од истражувањето тоа дополнително го потврдуваат, бидејќи норвешката престолнина доби најниска оцена кога станува збор за пристапноста на рестораните, со само 24 проценти позитивни одговори.

На списокот на скапи градови очекувано се најдоа и некои од најпознатите светски метрополи, меѓу кои Лондон, Сиднеј и Лос Анџелес. Притоа, Лондон особено се издвоил како најскап град за ноќен излез, бидејќи само 16 проценти од неговите жители го сметаат за пристапен. Сепак, британската престолнина има и своја посветла страна. Дури 83 проценти од жителите на Лондон истакнуваат дека уметноста и културните содржини во градот се евтини или целосно бесплатни.

А кои се најповолните места за живот?

Сосема поинаква слика се отвора на другиот крај од листата. Два колумбиски града, Меделин и Богота, според мислењето на нивните жители важат за најповолни места за живот. Во Меделин дури 89 проценти од испитаниците сметаат дека одењето во ресторан е пристапно, 83 проценти го велат истото за пијалак во бар, додека импресивни 94 проценти тврдат дека кафето таму навистина е евтино. Малку изненадувачки, меѓу поповолните градови се најдоа и кинеските мегаполиси Пекинг и Шангај, особено кога станува збор за театарот и културните содржини, кои мнозинството од локалното население ги доживува како финансиски достапни.

Интересно е и тоа што меѓу американските градови како единствен поповолен се истакнал Њу Орлеанс. Градот добил високи оценки кога станува збор за концерти и пијалаци во барови, што дополнително ја потврдува неговата репутација како место каде врвната забава и богатата културна сцена може да се доживеат без прекумерно оптоварување на домашниот буџет.

Важна напомена

Важно е да се истакне дека истражувањето на порталот „Time Out“ не се занимавало со трошоците за домување, кирија или секојдневни намирници, туку исклучиво со цените на излегувањата и културниот живот во градовите. И покрај тоа, резултатите јасно покажуваат колку доживувањето на секојдневието може да се разликува од град до град и како поимот на скапотија или поволност најверодостојно можат да го проценат токму оние што живеат во тие градови.