Саудиска Арабија тивко го проширила пристапот до својата единствена продавница за алкохол, дозволувајќи им на богатите странски резиденти да купуваат алкохол, што е најновиот чекор во експериментот со либерализација на некогаш ултраконзервативното кралство.
Иако немало официјално соопштение за одлуката, веста за неа брзо се проширила, пренесе АП и сега може да се видат редици автомобили во Дипломатскиот кварт на саудискиот главен град Ријад.
Продавницата се отворила во јануари 2024 година за „немуслимански дипломати“.
Новите прописи сега им дозволуваат на немуслиманските странци со премиум дозвола за престој, која се издава на странци со специјализирани вештини, инвеститори и претприемачи, да купуваат алкохол.
Де факто владетелот на Саудиска Арабија, престолонаследникот Мохамед бин Салман и неговиот татко, кралот Салман, спроведуваат драматична политика на либерализација во кралството со цел привлекување туризам, зајакнување на меѓународниот бизнис и намалување на зависноста на економијата од нафта, пренесе АП.
Кралството, кое се придржува до исламскиот шеријатски закон, отвори кина, им дозволи на жените да возат и беше домаќин на големи музички фестивали. Сепак, политичкиот говор и несогласувањето остануваат строго криминализирани, потенцијално казниви со смрт.
Алкохолот останува забранет за пошироката јавност.
Необележаната продавница наликува на „duty-free“ продавница, а нејзината сопственост не е официјално откриена. Интересно е што безбедносните мерки се многу строги, при што секој посетител подлежи на проверка на подобност и претрес пред да влезе. Телефоните и камерите се забранети, а персоналот дури ги проверува и очилата.
Асошиејтед Прес разговарал со неколку клиенти кои ја напуштале продавницата, а кои зборувале под услов на анонимност поради стигмата околу алкохолот. Тие истакнале дека производите се доста скапи и дека дипломатите се ослободени од данок при купувањето, додека носителите на премиум дозволи за престој не се.
Кралот Абдулазиз, основачот на Саудиска Арабија, ја забранил продажбата на алкохол по инцидентот во 1951 година кога еден од неговите синови, принцот Мишари, пијан, употребил сачмарка за да го убие британскиот вицеконзул Сирил Оусман во Џеда.
