По грипот и коронавирусот, светот се соочува со нов здравствен предизвик – ширењето на аденовирусот, кој покажува поголема отпорност од досегашните сезонски инфекции.
Се наведува дека бројот на заболени расте и дека вирусот брзо се шири, оставајќи зад себе загрижувачка трага од пациенти со тешки симптоми.
Медицинскиот директор за превенција и контрола на инфекции во здравствениот систем „Џеферсон Хелт“ – Ерик Сачинвала предупредува на пораст на бројот на заболени од состојба позната како аденовирус, која по многу нешта наликува на грип или коронавирус, пишува „Mirror“.
Меѓутоа, како што истакнува, за разлика од болестите со кои веќе сме запознаени, кај аденовирусот постојат значително помалку можности за лекување. Доколку, за жал, се заразите, можно е едноставно да мора да издржите додека симптомите не поминат.
За среќа, во поголемиот број случаи аденовирусот има благи симптоми, но како и кај ковидот или грипот, кај лицата со ослабен имунитет симптомите можат да станат посериозни.
Сепак, постои една работа што овој вирус го прави попроблематичен од сличните инфекции, пренесува „Daily Star“. Имено, аденовирусот е поотпорен од грипот или коронавирусот.
Сачинвала за „PhillyMad“ изјави: „Прилично е заразен бидејќи е поотпорен од другите вируси – сапунот и водата или вообичаените средства за дезинфекција не го уништуваат, па тој подолго опстојува во околината“.
Аденовирусот може да предизвика различни симптоми, вклучувајќи:
– отежнато дишење
– течење на носот
– болка во грлото
Други симптоми можат да бидат дијареја или конјунктивитис, но тие се разликуваат, бидејќи постојат повеќе од 60 соеви на овој вирус.
Во повеќето случаи, вели Сачинвала, аденовирусот може да се држи под контрола со одмор. Сепак, лицата кои се под поголем ризик, како што се постарите, бремените жени или имунокомпромитираните, треба повнимателно да ги следат своите симптоми.
Тој додаде дека, доколку состојбата се влошува, треба да се повика лекар и детално да се опишат симптомите. Причината е тоа што вирусот се пренесува преку близок контакт, па здравствениот работник може да процени дали ризикот од доаѓање е поголем од користа за пациентот.
Сачинвала нагласи дека телесната температура е особено важен показател. Доколку треската ја доведе телесната температура до 40 степени, тоа е знак за посериозна состојба.
Вообичаено е симптомите да почнат да се повлекуваат по приближно два дена. Меѓутоа, ако траат подолго од три дена без подобрување, и тоа е знак за тревога.
Лекарот објасни и дека порастот на бројот на случаи на грип на јужната хемисфера порано во текот на годината можеби придонел за поголем број заболени на северната хемисфера сега. Тој додаде и дека дополнителен фактор е фактот што сè помалку луѓе се вакцинираат против грип.
