Меѓутоа, додека филмот наидува на добар прием кај публиката, во јавноста истовремено се појавија и остри обвинувања од страна на синот на човекот чиј живот послужил како инспирација за приказната.

Филмот го режирал и го напишал Крејг Бруер („Hustle & Flow“, „Dolemite Is My Name“), а се темели на истоимениот документарец од 2008 година на режисерот Грег Кохс.

Семејството: „Сето тоа се лаги“

Во средиштето на контроверзијата е Мајкл Мајк Сардина Помладиот, синот на починатиот Мајк Сардина, кој тврди дека филмската приказна е неточна и дека од неа се изоставени клучни делови од семејната реалност – вклучително и неговата улога во животот на татко му. Во повеќе изјави за американските медиуми, тој рекол дека неговиот татко „се превртува во гроб“ и дека филмот, иако емотивен, „не е вистинит“.

Тој дури ги нарекол Хадсон и Џекман „чудовишта“, тврдејќи дека целосно бил изоставен од филмот и од промотивните активности, иако, според неговите зборови, бил ангажиран како консултант на проектот.

Слични забелешки има и неговата сестра Анџелина Сардина, која се појавува во филмот, но тврди дека приказот на нивните животи е „драматизиран до степен што повеќе не е верен“. Сепак, таа нагласила дека „единственото нешто што навистина е вистинито“ е љубовта меѓу нивниот татко и Клер Сардина.

Важен детал: вдовицата го поддржува филмот

За разлика од децата, вдовицата на Мајк и партнерка од музичкото дуо, Клер Сардина, според достапните информации, го поддржува филмот и учествувала во промоцијата. Хадсон во повеќе наврати истакнувала дека за време на снимањето била во близок контакт со Клер и дека ѝ било исклучително важно таа да се чувствува почитувано и да биде претставена на начин со кој се согласува.

Запрашана да ги коментира обвинувањата на Мајкл Сардина Помладиот, Хадсон не навлегувала во детали. Рекла дека „не е вистинската личност“ да одговара на такви прашања и дека, „од почит кон авторите на филмот“, не сака да коментира елементи од создавањето на приказната. Нагласила дека со Клер Сардина имала позитивно искуство и дека таа стои зад проектот.

За што станува збор во филмот?

„Song Sung Blue“ ги следи Мајк и Клер Сардина, кои настапуваат како трибјут бенд посветен на Нил Дајмонд под името „Lightning & Thunder“. Филмот го дистрибуира „Focus Features“ во Соединетите Американски Држави, а „Universal“ на меѓународно ниво, а Нил Дајмонд одобрил користење на своите песни, како што бил случајот и со оригиналниот документарец.

Покрај Хадсон и Џекман, во филмот играат и Мајкл Империоли, Ела Андерсон, Мустафа Шакир, Фишер Стивенс и Џим Белуши.

И покрај контроверзиите, Хадсон за улогата на Клер добила номинација за „Actor Awards“ (наградите на актерското здружение, порано познати како SAG награди) во категоријата за најдобра главна женска улога, што дополнително ги поттикнало шпекулациите за можен голем успех на филмот во текот на сезоната на награди.

Од друга страна засега нема официјален одговор од продукцијата на тврдењата на Мајкл Сардина Помладиот. Тој во интервјуа ја спомнувал можноста за понатамошни потези, вклучително и правни опции, но во овој момент не е познато дали е иницирано нешто формално.