Бројни туристички водичи и медиуми го истакнаа Иос како место што „мора да се посети“ оваа година, пофалувајќи ја неговата живописна култура и недопрена природа. Сето тоа се случува додека островот развива нов пристап кон туризмот, со акцент на одржливоста и квалитетот на живот.

Иос на листата на препорачани дестинации за 2026

Неколку меѓународни публикации го вклучија Иос меѓу препорачаните дестинации за патувања во 2026 година. Британскиот весник „The Times“ ја прогласи Хора, главниот град на Иос, за едно од 25-те најубави села во Грција. Во текстот се наведува дека традиционалната населба ги освојува посетителите со своите бели, коцкести куќи и тесни, стрмни улички.

Меѓу неизоставните атракции се издвојува црквата Панагија Гремиотиса, сместена на највисоката точка на островот, од каде се пружа импресивен панорамски поглед кон Егејското Море – особено волшебен во време на зајдисонце.

Во написот се истакнуваат и значајни историски локалитети, како праисториската населба Скаркос, која датира од 3-от милениум п.н.е., како и гробот на Хомер.

Островот го претстави и италијанската веб-страница „WomTravel.it“, специјализирана за современи трендови во патувањата кај младите. Тие ја истакнале сè поголемата наклонетост на помладата публика кон дестинации што нудат разновидни искуства – од раздвижен ноќен живот, до активности во природа и културни содржини. На листата од 14 европски „дестинации на новата генерација“, оваа популарна страница го рангираше Иос на деветтото место.

Исто така, островот се најде и на годишната листа на најдобрите грчки острови што ја објавува францускиот туристички водич „Petit Futé“.

Одржливоста во центарот на развојната стратегија

Градоначалникот на Иос, Гикас Гикас, неодамна нагласил дека стратегијата за развој на островот повеќе не се темели само на унапредување на туристичката понуда, туку целта е да се создаде дестинација со висок квалитет на живот – и за посетителите и за локалното население.

Грчките власти одобриле финансирање во износ од 100.000 евра за санација на штетите настанати од природни непогоди и за подобрување на основната инфраструктура на островот.

Во Програмата за јавни инвестиции е вклучен и проектот за изградба на затворена спортска сала, со вкупна вредност од 1.862.000 евра. Новиот спортски комплекс ќе ги задоволи потребите и на жителите и на туристите.

Благодарение на овие инвестиции, Иос се позиционира како водечка одржлива дестинација за 2026 година, со што се издвојува меѓу грчките острови кои сè почесто се соочуваат со негативните последици од масовниот туризам – од преоптоварена инфраструктура до притисок врз локалните ресурси.