Но, колку често всушност треба да се тушираме – дали е доволно туширање на секои два до три дена или секојдневното миење е неопходно? Лекарката Елизабет Гордон Спрат рекла дека одговорот зависи од возраста, пренесе „Unilad“.

Зошто туширањето е важно?

Д-р Гордон Спрат најпрво објаснила зошто хигиената е важна. Во објава на блогот „University Hospitals“ напишала: „Туширањето е важно од повеќе причини. Во текот на денот на кожата се насобираат пот, бактерии, изумрени клетки од кожата и нечистотии од околината, а миењето помага да ги отстраниме“.

Опасности од пречесто туширање

Иако може да изгледа дека почестото туширање значи и поголема чистота, тоа всушност може да создаде проблеми со кожата. „Природната маснотија и влагата на кожата ја штитат од надворешни влијанија“, додала таа. „Ако некој се тушира премногу често или користи жешка вода и агресивни сапуни, тоа може да ја оштети природната заштитна бариера на кожата, која помага да се задржи влагата“, објаснила Спрат.

Колку често треба да се туширате во зависност од возраста?

Д-р Елизабет истакнала дека повеќето возрасни треба да се тушираат еднаш дневно. Сепак, за повозрасните лица препораката може да биде поретко – на секои два до три дена. Таа објаснила дека луѓето постари од 65 години најчесто имаат сува кожа, а честото туширање може дополнително да ја влоши состојбата.

Таа истакнала и колкав е „максимумот“ за повеќето луѓе: „Најмногу што се препорачува е туширање двапати дневно“, рекла д-р Гордон Спрат.

Нов тренд: туширање во темница

Неодамна се појавил и тренд познат како „туширање во темница“ („dark showering“).

Како што кажува и името, станува збор за ноќно туширање во затемнета бања. „Главната предност на ноќното туширање е тоа што во текот на денот телото и косата можат да соберат алергени и иританси од воздухот и нечистотија, особено во летните месеци – од полен, хемикалии и пот“, објаснил лекарот Џузепе Арагона.