На само еден миг, една карпа во Калифорнија блеснува како вжештена лава, а водопадот се претвора во огнена река – глетка што изгледа нереално, но е целосно природен феномен.

Спектакуларниот природен феномен се подготвува да го осветли вечерното небо во националниот парк во американската сојузна држава Калифорнија. Познат како „огнен водопад“ Јосемити (Yosemite Firefall), оваа глетка прави еден од водопадите во националниот парк, наречен Хорстејл, да засвети во силна портокалова боја – наликувајќи на лава што се слева низ вулкан.

Но без грижа, не станува збор за вжештена лава.

Сјајниот ефект настанува кога светлината од заоѓањето на сонцето го погодува водопадот под точно одреден агол.

Овој посебен спектакл се случува секој февруари во прочуениот Национален парк Јосемити во Калифорнија. Трае само неколку минути при зајдисонце, кога водопадот Хорстејл се спушта по големата карпеста формација позната како Ел Капитан и почнува да свети како да е во пламен – по што и го добил името „Огнен водопад“.

Сè е резултат на природната игра на светлината и водата што се одвива непосредно пред сонцето да исчезне под хоризонтот. Додека сонцето заоѓа, неговите зраци го осветлуваат водопадот и карпата зад него.

Сончевата светлина минува низ водата што се спушта и ја претвора во каскада од огнени бои.

Оваа глетка секоја година привлекува илјадници посетители, најчесто од втората недела на февруари, кои се надеваат дека во живо ќе го видат овој настан.

Зошто се појавува само во февруари?

За да се случи оваа магична глетка, три различни фактори мора да се совпаднат во ист момент – а тоа се случува само во период од околу две недели во текот на овој месец.

Пред сè, сончевата светлина мора да падне врз водопадот под соодветен агол, што се случува само во средината и кон крајот на февруари секоја година.

Исто така, потребно е да има доволно вода. Хорстејл е сезонски водопад кој најчесто тече во текот на зимата и раната пролет, благодарение на топењето на снегот и врнежите.

И на крај, неопходно е ведро небо. Дури и мал облак во погрешен момент може да го заклони сонцето и да спречи целиот ефект да се случи.