Иако многумина се убедени дека канабисот е побезбеден од легалниот и широко достапен алкохол и едното и другото носат сериозни здравствени ризици, пишува „LADbible“.

Долгорочни ефекти од алкохолот

Иако повремената консумација често не се доживува како особено ризична, редовното пиење над препорачаните граници може сериозно да му наштети на здравјето. Британската Национална здравствена служба (NHS) наведува дека долготрајната злоупотреба на алкохол може да го зголеми ризикот од мозочен удар, заболувања на црниот дроб, воспаление на панкреасот, покачен крвен притисок и повеќе видови рак.

Алкохолот се поврзува и со менталното здравје – Кралскиот колеџ на психијатри предупредува дека може да ја наруши хемијата на мозокот и да го зголеми ризикот од депресија, панични нарушувања и импулсивно однесување. Со текот на времето може да ги оптовари и срцето, панкреасот и бубрезите, како и да го ослаби имунолошкиот систем.

Долгорочни ефекти од канабисот

Од друга страна, студија објавена во 2016 година во списанието „International Journal of Drug Policy“ укажува дека повеќето долгорочни штетни ефекти од канабисот се поблаги од оние што ги предизвикува алкохолот. Авторите напомнуваат дека ефектите од канабисот се помалку истражени – меѓу другото затоа што има помал број луѓе кои го користат секојдневно, а недостигаат и истражувања што би ги следеле корисниците со децении.

Познато е дека пушењето марихуана најмногу ги погодува белите дробови, а кога станува збор за менталното здравје, некои студии ја поврзуваат честата консумација со зголемен ризик од психотични симптоми, особено ако се започне на рана возраст. Сепак, студија од 1994 година (Ентони и соработници) наведува дека ризикот од развој на зависност од канабис е значително помал отколку кај алкохолот, никотинот или хероинот, како и дека здравствените и социјалните последици во просек се помалку сериозни.

Што е на крајот поштетно?

Кон крајот на 20 век преовладуваше мислењето дека редовното пушење канабис може да влијае на респираторниот систем слично како тутунскиот чад. Подоцна беше потврдено дека кај редовните корисници на марихуана, вклучително и кај оние кои не пушат тутун, се забележуваат повисоки стапки на хроничен бронхитис.

Иако психотичните симптоми се еден од попознатите можни ризици, особено при рано и често користење, поддржувачите на канабисот често истакнуваат дека смртоносните предозирања со оваа дрога се исклучително ретки, за разлика од алкохолот или опиоидите.

Исто така, според студија од 2012 година (Асбриџ, Хејдон и Картрај), возењето под дејство на канабис умерено го зголемува ризикот од сообраќајни несреќи, но значително помалку отколку алкохолот. Сепак, за цврст заклучок и понатаму недостигаат доволно долгорочни, споредливи податоци и квалитетни студии.