Повеќето избираат да се преселат во соседна Австралија во потрага по „подобар живот“, а таква одлука неодамна донела и поранешната премиерка Џасинда Ардерн, чиј кабинет потврди дека таа и нејзиното семејство се преселиле во Сиднеј, пишува Би-би-си.

Ардерн, нејзиниот сопруг Кларк Гејфорд и нивната седумгодишна ќерка Нев биле видени како бараат куќа на богатите северни плажи на австралискиот град, а веста минатата недела ја потврдил нејзиниот кабинет.

Нејзиниот потег повторно го насочил вниманието кон борбата на Нов Зеланд да ги задржи своите граѓани, додека земјата се соочува со забавена економија, криза со трошоците за живот и недостиг од станови.

„Потегот на Ардерн веројатно ќе се смета за симбол на овој поширок тренд. Некои ќе го протолкуваат како дезертерство“, изјавил за Би-би-си Алан Гамлен, директор на Миграцискиот центар при Австралискиот национален универзитет.

Се наведува дека само минатата година повеќе од 66 илјади Новозеланѓани ги спакувале куферите, што во просек изнесува околу 180 лица дневно – значајни бројки за држава со само 5,3 милиони жители.

Ардерн го напуштила Нов Зеланд набргу откако ја напуштила и политиката во јануари 2023 година и прифатила стипендија на Харвард. Нејзиниот кабинет наведува дека нејзиното семејство патувало неколку години и дека одлучиле „засега“ да бидат во Австралија.

„Таму имаат работа, а тоа им носи и дополнителна предност – повеќе време поминато дома во Нов Зеланд“, изјавил портпаролот за локалните медиуми.

Тој не прецизирал кога семејството пристигнало во Австралија ниту каква работа извршувале, но напоменал дека не е невообичаено поранешни лидери да поминуваат време во странство по заминувањето од функцијата, пишува Гардијан.

Во 2017 година, Ардерн стана најмладата жена на чело на држава во светот, на возраст од 37 години, и влезе во историјата како втората жена која родила дете додека извршувала избрана функција.

На власт беше шест години, а нејзиното лидерство го одбележаа низа национални и меѓународни кризи, вклучувајќи го нападот во Крајстчрч и Ковид-19 пандемијата.

Во јануари 2023 година објави дека се повлекува од функцијата премиерка затоа што повеќе „немала доволно сила“. Минатата година објави мемоари, а на Санденс премиерно беше прикажан документарец за нејзиното лидерство и личниот живот.

Зошто масовно се напушта Нов Зеланд?

Долгорочниот тренд на иселување од земјата која се одликува со прекрасни природни подрачја и пејзажи, како и безбеден и мирен живот, сепак станал неизбежен, особено за младите луѓе. Младите често сакаат најпрво да искусат живот во странство пред да се вратат во родниот крај.

Гамлен појаснил дека „трендот повторно забележливо се појавил во последните пет години“. Младите сè почесто го продолжуваат престојот во странство и бараат потрајна преселба, бидејќи сметаат дека нивната земја не им нуди иднина каква што им е потребна.

Голем проблем станала високата стапка на невработеност, за која се вели дека достигнала нивоа невидени со децении (со исклучок на Ковид-19 пандемијата), а растот на платите не успеал да ја следи инфлацијата. Така пораснале и трошоците за живот, а цените на намирниците, на пример, се меѓу највисоките во развиениот свет.

Намалена е и достапноста на домувањето, а недостигот од станови и куќи за живеење довеле до зголемување на кириите и цените за купување недвижности. Постојат и големи нееднаквости во здравството и образованието, наведува Би-би-си. Иако Велика Британија и САД се популарни дестинации за иселување, се проценува дека половина од новозеландските иселеници заминале во Австралија, каде што веќе повеќе од половина век уживаат еднакви работнички права.

Земјата се приближува кон општите избори во ноември, а многу политичари се обидуваат да ги убедат гласачите дека имаат решенија за настанатата состојба. Во едно сите се согласуваат – економијата мора да се зајакне, но имаат различни визии како да се постигне тоа: од намалување на притисокот врз пазарот на труд и инфраструктурата преку ограничување на имиграцијата, до создавање повеќе работни места преку поттикнување инвестиции во станбена изградба.

Пратениците од владејачката коалиција сметаат дека „одливот на мозоци“ (бројни лекари, политичари и професори ја напуштаат земјата бидејќи на друго место имаат подобри плати, како што направила и Ардерн) не е нов проблем и тврдат дека нејзините понови и подлабоки проблеми се последица на пандемијата.

Министерот за домување Крис Бишоп изјавил за Би-би-си дека неговата влада постигнува „добар напредок“ во претворањето на земјата во место каде што нејзините граѓани сакаат да останат.

„Но ниту за момент не се преправам дека сè е совршено во Нов Зеланд. Очигледно не е. Меѓу многу Новозеланѓани владее длабока загриженост поради состојбата во земјата“, истакнал тој.