На словенечкиот кошаркар Лука Дончиќ животот му се преврте наопаку во последната година. Минатиот февруари ненадејно беше трејдуван од Далас Маверикс во Лос Анџелес Лејкерс, што го натера да промени бројни животни навики (меѓу другото и да ослабне), а сега соопшти дека ја прекинува свршувачката со Анамарија Голтес.

Тие двајца „се знаат цел живот“, заедно се 13 години, а се свршија во јули 2023 година. Неколку месеци подоцна, парот ја доби и првата ќерка Габриела, а потоа минатиот декември и Оливија. Токму кога Анамарија Голтес се породила и Лука Дончиќ дошол во болница, свршеницата повикала полиција затоа што сакал да ја однесе постарата ќерка со себе во САД, по што во приказната брзо се вклучиле и адвокати. Во наредните месеци се очекува одлука за начинот на кој ќе се реши ситуацијата на овој невенчан пар.

Она што засега е познато, барем според извештаите од САД, е дека Лука Дончиќ „секогаш финансиски се грижел за семејството и без ограничување ги плаќал сите трошоци за своите деца“, додека полицијата не поднела пријава против него кога го сослушала по повикот во породилиштето во Крањ.

Колку заработува Лука Дончиќ?

На сите им е јасно дека Дончиќ е еден од најдобрите спортисти во светот – а со тоа и меѓу најплатените. Меѓутоа, токму поради тоа што Далас Маверикс го трејдуваа во Лејкерс, изненадувајќи ја целата планета, изгуби околу 50 милиони долари и можност минатото лето да стане рекордер во НБА.

Бидејќи не е во брак со Анамарија Голтес, тие двајца нема да ја делат неговата досегашна заработка во НБА.

За што станува збор? Поради трејдот, Дончиќ не можеше да потпише „super max“ договор вреден 345 милиони долари како франшизен кошаркар, па затоа летото потпиша договор од „само“ 165 милиони долари на три години, со играчка опција за 2028 година.

Оваа сезона Дончиќ ќе заработи нешто помалку од 46 милиони долари, потоа 49,8 милиони, па 53,8 милиони, додека веројатно во 2028 година – ќе потпише нов договор пред да се активира „играчката опција“. Тоа лето Дончиќ би требало да го урне рекордот на НБА и да потпише договор вреден околу 417 милиони долари за пет години, кога буквално би заработувал околу еден милион долари по натпревар.

Што рече Дончиќ за раскинувањето на свршувачката?

„Ги сакам своите ќерки повеќе од сè и правам сè што можам да бидат со мене во САД во текот на сезоната, но тоа не беше можно, па неодамна донесов тешка одлука да ја прекинам свршувачката. Сè што правам е за среќата на моите ќерки и секогаш ќе се борам да бидам со нив и да им овозможам најдобар живот што можам“, изјави Словенецот, кој ќерката Оливија ја видел само кога се родила, додека од декември не ја видел ниту постарата ќерка Габриела.