Со само 5,8 квадратни километри површина и крајбрежје што се протега на 15,4 километри, релативно лесно е да се истражи секој негов агол. Иловик е најјужниот населен остров во лошињскиот архипелаг, административно му припаѓа на градот Мали Лошињ, а се наоѓа на северот од Кварнериќ, опкружен со Сусак, Уније, Црес и Премуда.

Идеален е за сидрење на јахти и помали бродови, каналот го штити од ветрови

Поради бујната медитеранска вегетација и шарените цвеќиња, палмите, олеандрите и двата стогодишни еукалиптуси, Иловик е познат и како „остров на цвеќето“. Веселите бои и опојните мириси ќе ве следат на секој чекор низ целото место. Флората на овој мал остров совршено се надополнува со онаа што го краси и блискиот Лошињ, создавајќи живописен природен мозаик кој воодушевува уште на прв поглед.

Со сето тоа што е наведено, воопшто не е чудо што за Иловик велат дека има повеќе цвеќиња отколку жители, а нив таму има само околу стотина! Од соседното островче Свети Петар го дели канал долг 2,5 километри и широк околу 300 метри, кој го штити од сите ветрови освен од југот. Токму затоа Иловик е идеален за сидрење на јахти и помали бродови.

Првите хрватски доселеници на островот пристигнале во 18. век од Вели Лошињ

На претходно споменатиот Свети Петар се наоѓаат гробиштата на жителите на Иловик, опкружени со ѕидови од 11. век. На тоа место некогаш имало бенедиктински манастир, а уште порано и византиска тврдина. Своја тврдина во 1600 година изградиле и Млечаните, првенствено за одбрана од ускоците.

Што се однесува до самиот Иловик, првите хрватски доселеници на него пристигнале кон крајот на 18. век од Вели Лошињ. Островот низ историјата имал неколку различни имиња: Neumae Insulae, Sanctus Petrus de Nimbis и San Pietro dei Nembi, а денешното име му го дале токму доселениците.

Многу Иловчани денес живеат во САД, но старите обичаи и традицијата сè уште постојат

Сепак, првите жители на Иловик биле Илирите, односно племето Либурни, а римското наследство на островот и ден-денес е видливо во форма на ѕидини, саркофази, нумизматички наоди и подводно археолошко наоѓалиште. Идентитетот на островот се градел врз рибарството, овчарството, лозарството и градинарството, а денес во него длабоко е вткаен и туризмот.

Интересен е и податокот дека трипати повеќе Иловчани живеат во САД, отколку што ги има на нивниот роден остров. Но жителите што останале грижливо ја негуваат традицијата и обичаите: нивната најважна локална свеченост е „Петрова“, а се слави на 28 и 29 јуни во чест на светите Петар и Павле, со света литургија, процесија и палење на огнови.

Спој од море, сонце и тишина која лекува, ве очекува на песочната плажа Паржине

Населбата е прошарана со прекрасни камени куќички и живописни улички, а има една продавница и неколку шармантни коноби и ресторани. Иловик е поврзан со Лошињ преку бродски линии, а постои и брза линија што го поврзува со Риека, Задар и Пула.

Иако не е голем, овој остров има прекрасни плажи. Најпознатата песочна плажа се вика Паржине, се наоѓа на југоисточната страна на Иловик, на околу 20 минути пешачење од населбата, и е идеална за оние што бараат спој од море, сонце и тишина која лекува.

Јужниот дел на островот крие питомни заливи што во лето нè повикуваат на капење во кристално чистиот Јадран. Ако сакате да побегнете од градската врева и да го почувствувате мирниот островски живот, Иловик е дестинација на која мора да ѝ дадете шанса!