Врховниот суд на Шпанија соопшти дека физички контакт од сексуална природа без согласност, меѓу другото и несакан бакнеж во рака, претставува кривично дело-сексуален напад, а не вознемирување.
Таква одлука е донесена во постапка што се водела поради инцидент од јануари 2023 година на автобуска станица во населбата Алкобендас во Мадрид, во кој маж ѝ ја фатил раката на жена, ја бакнал без нејзина согласност и се обидел да ја убеди да тргне со него, нудејќи ѝ пари. Тој го направил тоа јавно, без закани или физичко заплашување, а понискиот суд го прогласил виновен за сексуален напад и му изрекол парична казна, пренесе шпанскиот портал „Јуро викли њуз“.
Обвинетиот поднел жалба тврдејќи дека неговото однесување треба да се класифицира како улично вознемирување со сексуален елемент, а не како сексуален напад, како и дека, бидејќи немало насилство или заплашување, инцидентот не ги исполнувал условите за кривично дело од сексуална природа.
Меѓутоа, како што се наведува, Врховниот суд го отфрлил овој аргумент и појаснил дека секој несакан физички контакт во кој нема согласност претставува сексуален напад, истакнувајќи дека чинот на бакнување, дури и без употреба на сила, ја нарушува сексуалната слобода и автономијата на жртвата.
Сексуалниот напад вклучува физички контакт од сексуална природа без согласност, дури иако е од помал обем и носи потешки правни последици, а таа разлика појаснува кога делото треба да се третира како кривично дело, а не како несоодветно општествено однесување.
Во овој случај, судот ја потврдил паричната казна од понискиот суд во износ од повеќе од 1.500 евра, нагласувајќи дека правната заштита се применува на сите дејствија на несакан сексуален контакт.
Како што се наведува, правната разлика меѓу вознемирување и напад овозможува властите да преземат мерки кога ќе се преминат личните граници, дури и на јавни места како што се улици или постојки на јавен превоз.
