Секое одење во супермаркет е своевидна битка за домашниот буџет, но трговците имаат разработени стратегии за да нè поттикнат да трошиме повеќе.

Иако супермаркетите традиционално работат со ниски профитни маржи, кои се движат од еден до три проценти, тие ја надоместуваат таа загуба преку одредени производи чии цени се надуени до неверојатни висини.

Клучот на нивниот профит лежи во артиклите што ни нудат практичност, луксуз или едноставно играат на картата на нашите навики.

Некои основни намирници како млеко или пилешко често се продаваат по исклучително ниски цени, дури и со загуба, само за да нè привлечат во продавницата. Но, откако ќе влеземе, паѓаме во замката на производи со маржи што се далеку од разумни.

Кога купуваме вода – плаќаме пластика и реклама

Најшокантен пример е секако флашираната вода, чија цена може да биде и до четири илјади проценти повисока од цената на водата од чешма, која во повеќето случаи е подеднакво безбедна и здрава. Всушност плаќаме пластична амбалажа, маркетинг и транспорт, а истражувањата покажуваат дека дури една четвртина од флашираната вода се полни од општински водоводи. Покрај тоа, производството на пластични шишиња има огромен еколошки отпечаток. Долгорочно гледано, купувањето филтер за вода е инвестиција што се исплаќа веќе по неколку недели, истовремено штитејќи ја и околината и вашиот буџет.

Пекарски производи, свежо испечени

Веднаш зад водата се пекарските производи. Мирисот на свежо печен леб е стратешки мамец што нè привлекува кон пекарницата, но готовите колачи, мафини и разни печива можат да имаат маржа и до 300 проценти. Со оглед на тоа што трошоците за состојки како брашно и шеќер се релативно ниски, најголем дел од цената оди на труд и профит на продавницата. Подготовката дома, дури и со помош на готови смеси, е повеќекратно поевтина опција. Многу пекарници во супермаркетите нудат и попусти за производи на кои им истекува рокот, па ако планирате веднаш да ги консумирате, можете да поминете значително поевтино.

Измиено, исечено и спакувано овошје и зеленчук

Цената на практичноста, односно таканаречениот „данок на мрзеливост“, најочигледно се гледа кај овошјето и зеленчукот, како и кај готовата храна. Однапред измиеното, исечено и спакувано овошје и зеленчук има просечна маржа од околу 40% во споредба со цели плодови. На пример, килограм исечена лубеница може да чини и до десет пати повеќе од цела лубеница со иста тежина.

Подготвено месо – до 60% поскапо

Слична е ситуацијата и со месото. Пилешко или риба што веќе се исечени, оформени како ражничи или маринирани може да бидат и до 60% поскапи. Бидејќи веќе сте во продавница каде што ги има сите состојки, одвојувањето неколку минути за сечење дома носи значителна заштеда, а оброкот ќе биде и посвеж.

Зачини во убава амбалажа

Зачините од познати брендови во мали, убаво дизајнирани стаклени тегли често имаат маржа од речиси 100%. Нивниот вкус не е ништо подобар од оние во кесички, а уште поевтино ќе поминете во продавници за здрава храна каде што се продаваат на мерење.

Органско – побарајте на пазар

Слично на тоа, органските производи носат висока „премија“. Иако често се поздрав избор, нивната цена во супермаркетите е од 30% до дури 100% повисока од конвенционалните производи, поради поскапото производство и недостигот од државни субвенции. Ако ви е важно органското, побарајте ги на локалните пазари – ќе ги поддржите домашните производители и најверојатно ќе поминете поевтино.

Непрехранбени производи

Супермаркетите најмногу заработуваат од нашата желба сè да завршиме на едно место. Затоа непрехранбените производи како честитки, канцелариски материјал, батерии или сијалици се значително поскапи отколку во специјализирани продавници. На пример, маржата на честитките може да достигне и 200%. Трговците знаат дека малкумина ќе одат во друга продавница само за една честитка или пакет батерии. Но, ако планирате однапред, овие производи можете да ги најдете по многу пониски цени во дисконт продавници, дрогерии или онлајн.