Пандите Пинг Пинг и Фу Шуанг, кои никогаш досега не се сретнале, се подготвуваат за запознавање пред да ја напуштат Кина и да пристигнат во својот нов дом во зоолошката градина во американскиот град Атланта, каде што ќе живеат како пар, пренесе „NBC News“.
Пинг Пинг и Фу Шуанг ќе тргнат на долго патување од својот сегашен дом во Ченгду, град со повеќе од 20 милиони жители во југозападна Кина.
Додека мажјакот Пинг Пинг обожава да јаде бамбус, Фу Шуанг, чие име значи „двојна среќа“ е разиграна, но малку срамежлива женка која сака да грицка јаболка.
Парот на крајот ќе биде преместен во друга база за панди, подалеку на југот, пред да го започне своето патување кон Америка.
Пандите, чиј датум на патување сè уште не е објавен, досега никогаш не се сретнале, а ќе бидат испратени во Атланта во рамките на нов десетгодишен договор за заштита на природата, објавен пред посетата на американскиот претседател Доналд Трамп на Кина.
Зоолошката градина во Атланта наведе дека е воодушевена и почестена што учествува во заштитата и истражувањето заедно со Кинеското здружение за заштита на дивиот свет.
„Едвај чекаме да ги запознаеме Пинг Пинг и Фу Шуанг и да им посакаме добредојде на нашите гости, градот и заедницата, повторно радувајќи им се на пандите“, изјави претседателот и извршен директор на зоолошката градина, Рејмонд Б. Кинг.
Зоолошката градина и претходно угостила пар панди, а Лун Лун и Јанг Јанг станале нејзини главни атракции уште во 1999 година.
Овој пар во Атланта живеел 25 години и за време на престојот во зоолошката градина добил седум младенчиња, но во 2024 година се вратил во Кина.
Кина, единствената земја во која џиновските панди живеат во дивина, строго го контролира нивното испраќање во странство. Пекинг им ги позајмува пандите на други земји, но го задржува сопствеништвото над овие животни, вклучувајќи ги и сите младенчиња што ќе ги добијат.
Во последните години Кина продолжи да испраќа панди во САД како гест на добра волја. Во јуни 2024 година две џиновски панди беа испратени во Сан Диего, а четири месеци подоцна уште еден пар, Бао Ли и Ќинг Бао, пристигна во Националната зоолошка градина „Смитсонијан“ во Вашингтон.
Укинувањето на привилегијата за испраќање панди во друга земја понекогаш се толкува како знак за слабеење на дипломатските односи со Кина, пишува „NBC News“. Последните панди од Јапонија ѝ беа вратени на Кина во јануари, во период кога односите меѓу Токио и Пекинг беа на најниско ниво во последните неколку години.
Иако не е посебно поврзан со посетата на Трамп, најновиот гест на испраќање панди во САД има историски паралели. Кинескиот претседател Мао Це Тунг во 1972 година ја одбележал посетата на претседателот Ричард Никсон на Кина со тоа што ѝ подарил на Америка две панди, Линг-Линг и Хсинг-Хсинг, потсети „NBC News“.
Денес
