Иако остригите најчесто се споменуваат како афродизијак, експертите сега истакнуваат многу подостапен зачин кој би можел да помогне – цимет.

Како циметот може да влијае врз сексуалниот живот?

Експертите наведуваат неколку можни причини поради кои циметот би можел позитивно да влијае врз сексуалното здравје. Се смета дека може да има афродизијачко дејство, односно да ја поттикне сексуалната желба и уживањето, но и да придонесе за подобра општа телесна кондиција, што може да се одрази и на сексуалниот живот.

Главната активна состојка на циметот, цинамалдехид, може да помогне во опуштање на крвните садови и намалување на напнатоста поврзана со покачен крвен притисок. Со тоа се поттикнува подобра циркулација, која е важна за сексуалната возбуда.

Циметот има и противвоспалителни својства. Хроничните воспаленија можат негативно да влијаат на женското либидо, но се поврзуваат и со состојби што можат да придонесат за еректилна дисфункција. Освен тоа, циметот е богат со антиоксиданти, кои помагаат во заштита на организмот и во намалување на ризикот од хронични болести. Поедноставно кажано, подоброто општо здравје често значи и подобар сексуален живот.

Не е чудотворно решение

Експертите сепак предупредуваат дека циметот не е волшебен лек и дека нема да делува исто кај сите.

„Иако циметот кај некои лица може да го подобри сексуалното здравје, други можеби нема да забележат никаква разлика. Додавањето цимет во исхраната веројатно нема да ви наштети. Сепак, за користење цимет со цел подобрување на сексуалното здравје, задолжително консултирајте се со здравствен експерт“, изјавила медицинската експертка Џејми Џонсон за „VeryWell“.

Важно е да се имаат предвид и можните несакани ефекти. Кај некои луѓе циметот може да предизвика киселини, мачнина или дијареја, особено ако се консумира во поголеми количини.

Кои други намирници можат да помогнат?

За оние кои не сакаат цимет, постојат и други намирници кои традиционално се сметаат за афродизијаци. Најпознати се остригите, кои се богати со цинк, но не се по сечиј вкус.

Како алтернатива често се споменува калинката, особено кога станува збор за мажите. Истражувањата покажале дека би можела да биде корисна благодарение на високата содржина на антиоксиданти, кои можат поволно да влијаат врз здравјето на срцето и крвните садови, како и врз нивото на тестостерон.

„Ова овошје изобилува со антиоксиданти кои можат да го подобрат здравјето на срцето и крвните садови и да го зголемат нивото на тестостерон. Калинката е и богат извор на железо и помага во поттикнување на циркулацијата, која игра голема улога во сексуалната изведба кај мажите“, објаснил д-р Грант за „The Independent Pharmacy“.